Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 135 Hüküm no: 114 Orijinal metin no: [25a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Minho v. Köni’nin ev ve bahçesini Kigo v. Kiro’ya satması Vilâyet-i Rumeli’nde Ergirikasrı kazâsına tâbi‘ Lukşan nâm karye sükkânından Minho v. Köni nâm zimmî tarafından bey‘-i câ’i’z-zikri ikrâra ve kabz-ı semenine vekîl olup vekâleti Dimo v. Masko ve Dedo v. Anilo ve Duka v. Kiro nâm zimmîler şehâdetleri ile şer‘an vekâleti sâbite olan Dedo v. Andriye nâm zimmî mahfil-i kazâda işbu râfi‘ü’s-sifri’ş-şer‘î Kigo v. Kiro nâm zimmî muvâcehesinde bi’l-vekâle ikrâr ve i‘tirâf edip müvekkil-i mezbûrun emlâkinden olup karye-i mezbûrede vâki‘ bir tarafdan Kigo v. Tanaş mülkü ve bir tarafdan Martin v. Kiti mülkü ve bir tarafdan Vedo v. Kiro mülkü ve taraf-ı râbi‘i tarîk-i âm ile mahdûd bahçeyi müştemil mülk menzili, cemî‘-i tevâbi‘ ve levâhıkı ile müşterî-i merkūm Kigo’ya vekâletim hasebiyle iki bin iki yüz nakd-i râyic fi’l-vakt akçeye tarafeynden îcâb ve kabûlü hâviye bey‘-i bâtt-ı kat‘î ile bi’l-vekâle bey‘ ve ol dahi minvâl-i muharrer üzre iştirâ ve kabûl eyleyip semeni olan meblağ-ı mezbûr iki bin iki yüz akçeyi mezbûr Kigo yedinden bi’l-vekâle tamamen alıp [kabz] eylediğimden sonra sâlifü’z-zikr menzil-i mahdûd-ı mezbûru mahallinde zabt ve tasarrufu merkūm Kigo’ya bi’l-vekâle taslît eyledim min ba‘d menzil-i mahdûd-ı mezkûrda müvekkilim mezbûrun alâka ve medhali kalmadı. Mezbûr Kigo’nun mülk-i müşterâsı olmuşdur. Keyfe mâ yeşâ’ mutasarrıf olsun deyû bi’l-vekâle ikrâr edicek gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min şehri Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Mehmed Çelebi Çukadâr, Hüseyin Beşe b. Hasan, Ali Beşe b. Hüseyin ve gayruhüm mine’l-hâzırîn, Dimo v. Moko, Vedo v. İlo, Dedo v. Niko, Dedo v. Andriye, Pir v. Kiro, Lika v. Aleksi ve gayruhüm mine’l-hâzırîn.