Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 289 Hüküm no: 323 Orijinal metin no: [41b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beşir Ağa b. İbrahim’in Osman Ağa b. Halil’e borçlu olduğu ve borcun faizini ödemeyeceği Mahmiye-i İstanbul’da Molla Gürânî mahallesi sükkânından Osman Ağa b. Halil nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de Beşir Ağa b. İbrahim nâm kimesne mahzarında üzerine da‘vâ ve takrîr-i kelâm edip mezbûr Beşir Ağa zimmetinde cihet-i karz-ı şer‘îden iki bin iki yüz elli riyâlî guruş hakkım olup hattâ mezbûr Beşir Ağa cihet-i mezbûreden bana iki bin iki yüz elli riyâlî guruş deyni olduğunu ikrâr dahi ettiğinden sonra meblağ-ı mezbûrun bin beş yüz riyâlî guruşunu bi mislihî bana edâ ve teslîm ben dahi istîfâ ettiğimden sonra meblağ-ı bâkīnin dört yüz riyâlî guruşu için bana hâlâ râyic olan akçeden kırk bin akçe ve yüz guruşu için dahi on bin hurda ve züyûf akçe vermişidi suâl olunup ikrâr-ı mezbûruna binâen mezbûr Beşir Ağa vech-i muharrer üzre bana verdiği elli bin akçeyi alıp meblağ-ı mezbûr iki bin iki yüz elli guruşdan bâkī yedi yüz elli riyâlî guruşu bana edâya mezbûr Beşir Ağa[’ya] tenbîh olunmak matlûbumdur dedikde, gıbbe’s-suâl mezbûr Beşir Ağa cevâbında müdde‘î-i mezbûra cihet-i karzdan iki bin iki yüz elli guruş deynim vardır deyû ikrâr ettiğinden sonra bin beş yüz riyâlî guruşunu bi mislihî edâ edip dört yüz guruşu için vech-i muharrer üzre hâlâ râyic olan akçeden kırk bin akçe ve yüz guruşu için on bin hurda ve züyûf akçe vermişdim, lâkin müdde‘î-i mezbûra cihet-i mezbûreden deynim ancak iki bin riyâlî guruş iken iki yüz riyâlî guruş ribh verecek olmağla cihet-i mezbûrdan iki bin iki yüz elli riyâlî guruş deynim vardır deyû ikrâr etmişidim, vech-i muharrer üzre ikrâr ettiğim iki bin iki yüz elli riyâlî guruşun iki yüz elli riyâlî guruşu ilzâm olunmadık ribhdir deyicek gıbbe’s-suâl mezbûr Osman Ağa mezbûr Beşir Ağa’nın vech-i mübeyyen üzre ikrâr ettiği iki bin iki yüz elli riyâlî guruşun iki yüz elli riyâlî guruşu ilzâm olunmadık ribh olduğunu ikrâr etmeğin mûcebince mezbûr Beşir Ağa müdde‘î-i mezbûra vech-i muharrer üzre dört yüz guruş için verdiği kırk bin cedîd akçe ile yüz guruş için verdiği on bin hurda ve züyûf akçeyi alıp müdde‘î-i mezbûra deyni olan iki bin riyâlî guruşdan bâkī beş yüz riyâlî guruşu edâya mezbûr Beşir Ağa’ya tenbîh olundukdan sonra merkūm Osman Ağa dahi iki yüz elli riyâlî guruş taleb ile mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Yusuf b. Zülfikār, Şahin b. Yusuf, Abdi Çelebi b. Mahmud, Derviş b. Ali, Hasan b. Bayram, Abdi Çelebi b. Mustafa, Hasan Çelebi b. Ahmed.