Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 290 Hüküm no: 324 Orijinal metin no: [41b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ali’nin, câriye bahasından Abdünnebi b. Mustafa’dan alacaklı olduğu Mahmiye-i İstanbul hısnı ebvâbından Kumkapı dâhilinde Nişancı Paşa mahallesi sükkânından esirci tâifesinden olan işbu bâ‘isü’l-kitâb Mehmed b. Ali nâm kimesne meclis-i şer‘-i şerîfde Abdünnebi b. Mustafa nâm kimesne mahzarında üzerine da‘vâ ve takrîr-i kelâm edip merkūm Abdünnebi zimmetinde yedimden müşterâ ve makbûz orta boylu, açık kaşlı, elâ gözlü Rûsiyyetü’l-asl Mariya câriye bahâsından seksen beş esedî guruş hakkım olup meblağ-ı mezbûrun bir guruşunu merkūm Abdünnebi yedinden ahz ve bir guruş için dahi bir keyl bakla alıp bâkī seksen üç guruş hakkım zimmetinde kalmağın hâlâ taleb ederim suâl olunsun dedikde gıbbe’s-suâl mezbûr Abdünnebi cevâbında fi’l-vâki‘ zikr olunan câriye bahâsından müdde‘î-i mezbûra deynim olan seksen beş guruşun kırk guruşunu mukaddemâ müdde‘î-i mezbûra edâ ve teslîm edip ol dahi ahz u kabz ettikden sonra meblağ-ı bâkī kırk beş guruşunu dahi yedimden müşterâ ve makbûz çuka semeninden mezbûr Mehmed zimmetinde hakkım olan kırk beş guruşa takās ol dahi mukāssa ve kabûl eyledi deyû def‘le mukābele edicek gıbbe’l-istintâk ve’l-inkâr mezbûr Abdünnebi’den def‘-i mezbûrunu mübeyyine beyyine taleb olundukda ityân-ı beyyineden izhâr-ı acz ile istihlâf etmeğin müdde‘î-i mezbûr Mehmed semen-i mezbûr seksen beş guruşdan istîfâsını i‘tirâf eylediği iki guruşdan mâ‘adâ mezbûr Abdünnebi’den nakid otuz sekiz guruş ahz etmeyip ve bâkī kırk beş guruşunu dahi mezbûr Abdünnebi’nin vech-i mübeyyen üzre hakkı olan kırk beş esedî guruşa takās etmediğine yemîn teklîf olundukda ol dahi alâ vefki’l-mes’ûl half billâhi’l-aliyyi’l-a‘lâ etmeğin mûcebince meblağ-ı mezbûr seksen üç guruşu müdde‘î-i merkūma edâ ve teslîme mezbûr Abdünnebi’ye tenbîh birle mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Mehmed Çelebi Kethüdâ-yı muhzırân, Baba Resul b. Rıdvan, Süleyman b. Hasan, Mehmed b. Ramazan, Hasan b. Mehmed, Mustafa b. el-Hâc Ahmed ve gayruhüm mine’l-hâzırîn.