Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 136 Hüküm no: 115 Orijinal metin no: [25b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Ali ile Hacı Receb Bey’in boşanması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Süleyman Subaşı mahallesi sâkinelerinden Ayşe bt. Ali nâm âkile ve bâliğa hâtun meclis-i şer‘-i hatîr-i lâzımü’t-tevkīrde zevci işbu râfi‘ü’l-kitâb el-Hâc Receb Bey b. Abdullah nâm kimesne mahzarında bi tav‘ihâ ikrâr ve takrîr-i kelâm edip zevcim mezbûr el-Hâc Receb ile beynimizde şikāk vâki‘ olmağın zimmetinde mütekarrir olan bin akçe mehr-i müeccelimden ve nafaka-i iddet-i mu‘ayyene ve me’ûnet-i süknâmdan fâriğa olduğumdan mâ‘adâ levni beynimizde ma‘lûm bir sof zenne ferâce ve hamam rahtı ve iki aded yan keçemi bedel-i hul‘ olmak üzre zevcim mezbûr ile muhâla‘a eyleyip zikr olunan sof ferâce ve hamam rahtı ve yan keçelerini yedine def‘ ve teslîm ve zimmetini zevciyyete müte‘allik cemî‘-i de‘âvî ve mütâlebât ve eymân ve muhâsamâtdan ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde mezbûr el-Hâc Receb dahi meclis-i mezbûrda, zevcem mezbûre ile minvâl-i muharrer üzre olan hul‘-ı mezbûru kabûl ve bedel-i hul‘ olan eşyâ-i mersûmeyi mezbûre Ayşe yedinden alıp kabz edip zevciyyete müte‘allik da‘vâ ve talebin küllîsinden zimmetini ibrâ eyledim deyicek gıbbe’t-tasdîki’ş-şer‘iyyi’l-vicâhiyyi’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn li sene isneteyn ve seb‘în ve elf. Şuhûdü’l-hâl: Ali Bey b. Kasım el-Müezzin, Ali b. Musa, Abbas b. Kasım, İbrahim b. Süleyman, İbrahim Beşe b. Osman, Mustafa b. Mehmed ve gayruhüm mine’l-hâzırîn.