Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 137 Hüküm no: 116 Orijinal metin no: [25b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halomiç’in Megalidivri köyü ahalisinin zaîm Anber Mustafa Ağa’ya borçları olduğunun tespiti Vilâyet-i Rumeli’nde cezîre-i Mora’da Halomiç kazâsı a‘mâlinden Megalidivri nâm karye zimmîlerinden Papa İstamo v. Velisar ve Nikola v. Marvilo ve Riga v. Papayani nâm zimmîler kendi taraflarından asâleten ve yine karye-i mezbûre zimmîlerinden Kalviro v. Papa ve Dimo v. Yani ve Agalo v. Angelo ve Polidro v. Yani ve Anastas v. Aleksi nâm zimmîler ve sâirleri taraflarından ikrâr-ı âti’z-zikre vekîl olup Androviç v. Yani ve Andriye v. Yorgi nâm zimmîler şehâdetleriyle şer‘an vekâleti sâbite olmağın vekâleten meclis-i şer‘-i enverde hâlâ berât-ı pâdişâhî ve hükm-i şehriyârî ile karye-i mezbûr za‘îmi olan fahrü’l-emâsil ve’l-akrân Anber Mustafa Ağa b. Mehmed Ağa tarafından ikrâr-ı âti’z-zikri tasdîke vekîl olup bimâ hüve nehci’s-sübût şer‘an vekâleti sâbite olan karındaşı İsmail Ağa b. Mehmed nâm vekîl mahzarında her biri bi’l-asâle ve bi’l-vekâle ikrâr ve takrîr-i kelâm edip bundan akdem müvekkil-i mûmâ-ileyh Anber Mustafa Ağa’dan bin dört yüz kıt‘a riyâlî kebîr guruş istikrâz ve kabz eylediğimizde ol dahi vech-i muharrer üzre ikrâz ve teslîm etmeğin zikr olunan bin dört yüz kıt‘a riyâlî guruş her birimizin zimmetlerimizde lâzımü’l-edâ ve vâcibü’l-kazâ deynimizdir deyû her biri bi’l-asâle ve bi’l-vekâle ikrâr ve i‘tirâf eylediklerinde mukırrûn-ı mezbûrûnu asâleten ve vekâleten vech-i muharrer üzre cârî olan ikrârlarını vekîl dahi bi’l-vekâle vicâhen tasdîk ve şifâhen tahkīk etmeğin mâ hüve’l-vâki‘ kayd şüd. Fi’l-yevmi’s-sâdis ve’l-ışrîn min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Dilli Mehmed Efendi, İbrahim Bey el-Cündî, Mehmed Çelebi Lihanalı, Baldıdlı? Mehmed Beşe, Derviş Beşe es-Sarac, el-Hâc Ali yorganî, Mehmed Efendi b. Hasan, Arnavud Mustafa Ağa, Dilâver Muhzır, Hüseyin muhzır ve gayruhüm mine’l-hâzırîn.