Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 137 Hüküm no: 117 Orijinal metin no: [25b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Kurd’un ev arsasını Ali b. Abdülkerim’e satması Medîne-i Hazret-i Ebâ Eyyûb el-Ensârî -aleyhi rıdvânü’l-Bârî- mahallâtından Davud Ağa mahallesi sâkinlerinden Mehmed Beşe b. Kurd nâm kimesne meclis-i şer‘-i şerîf ve mahfil-i dîn-i münîf-i münevverde, işbu sâhibü’l-kitâb Ali b. Abdülkerim nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan mahalle-i mezbûrede vâki‘ emlâkimden mahalle-i mezbûrede vâki‘ bir tarafdan mahalle-i mezbûre mescidine mevkūfe menzil ve bir tarafdan İsmihan Hâtun mülkü ve bir tarafdan mekābir-i müslimîn ve bir tarafdan Ali Beşe mülkü ve tarîk ( ) ile mahdûd iki bâb fevkānî ve bir tahtânî oda ve bir tahtânî samanlık ve Ali Beşe ile müşterek bi’r-i mâ ve kenîf ve cüneyne-i zât-ı eşcâr-ı müsmire ve gayr-ı müsmire bahçe[yi] müştemil mülk menzilimden bir bâb fevkānî oda ve tahtında samanlık ta‘bîr olunan ahır ve sâlifü’z-zikr müşterek bi’r-i mâ ve bi’r-i mâ tarafından tûlen on üç zirâ‘ ve arzen sekiz zirâ‘ cüneyneden ifrâz ve alâmet-i fâsıla vaz‘ eyledikden sonra mâ‘adâsı on bin nakd-i râyic fi’l-vakt akçeye mezbûr Ali’ye tarafeynden îcâb ve kabûlü hâviye bey‘-i bâtt-ı sahîh-i şer‘î ile bâtten bey‘ ve ve teslîm edip ol dahi vech-i muharrer üzre iştirâ ve tesellüm ve kabûl eylediğinden sonra semeni olan meblağ-ı mezbûrü’n-na‘t on bin akçeyi tamamen mezbûr Ali yedinden alıp kabz eyledim ba‘de’l-yevm menzil-i mahdûd-ı mezkûrdan ifrâz eylediğim bir bâb fevkānî oda ve tahtında ahır ve müşterek su kuyusu ve tûlen on üç ve arzen sekiz zirâ‘ cüneyneden mâ‘adâ menzilin küllîsini, cemî‘-i tevâbi‘ ve levâhıkı ile mezbûr Ali’nin mülk-i mahz-ı müşterâsı ve hakk-ı sırfıdır [26a] keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Hasan Efendi b. Mansur el-İmâm, Nasuh Halîfe b. Abdüsselâm, Yusuf Halîfe b. Halil, Mahmud Çelebi b. Ali, Süleyman Çelebi b. Mehmed, Abdülkādir Beşe b. Yusuf.