Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 138 Hüküm no: 118 Orijinal metin no: [26a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Holomiç’in Megalidivri köyü ahalisinin vergi borçlarını tamamen ödedikleri Vilâyet-i Rumeli’nde cezîre-i Mora’da Holomiç kazâsına tâbi‘ Megalidivri nâm karyenin berât-ı pâdişâhî ve hükm-i şehinşâhî ile za‘îm olan fahrü’l-emâsil ve’l-akrân Anber Mustafa Ağa b. Mehmed Ağa kıbelinden hâlâ karye-i mezkûrede Subaşı olan Ali Bey b. Ömer nâm kimesne meclis-i şer‘-i şerîf-i lâzımü’t-teşrîfde, yine karye-i mezbûre zimmîlerinden Papa İstamo v. Velisar ve Nikola v. Marvilo ve Riga v. Papayani nâm zimmîler kendi tarafından asâleten ve yine karye-i mezbûre zimmîlerinden Androviç v. Yani ve Andriye v. Yorgi ve Kalviro v. Papa ve Dimo v. Yani ve Agalo v. Angelo ve Polidro v. Yani ve Anastas v. Aleksi ve sâirleri taraflarından ikrâr-ı âti’z-zikri tasdîke vekîl olup vekâletleri nehc-i şer‘î üzre sâbite olmağın vekâleten muvâcehelerinde bi’t-tav‘ ve’r-rızâ ikrâr ve takrîr-i kelâm edip işbu bin yetmiş bir senesine mahsûb olmak üzre karye-i mezbûrenin bedel-i avârız ve bedel-i nüzül ve sürsat ve sâir tekâlîf-i örfiyye ve şâkkalarını ve gāib ani’l-meclis İlya nâm yahudi’ye olan ma‘lûmetü’l-mikdâr deynlerini edâ ve teslîm için ahâlî-i karye-i mezbûre yedlerinden bin dört yüz kıt‘a riyâlî guruş-ı kebîr ahz ü kabz edip sene-i mezkûrede ahâlî-i karye-i mezbûre üzerlerine edâsı lâzım gelen bedel-i avârız ve bedel-i nüzül ve sürsat ve sâir tekâlîf-i örfiyye ve şâkkalarını cem‘lerine memûr olanlara ve deyn-i mezkûrlarını zimmî-i mersûm yahudiye edâ ve teslîm edip câmi‘-i tekâlîf-i mezkûrenin her birinden mümzâ ve mahtûm temessük almışdır ba‘de’l-yevm taleb eylerse ve merkūm yahudi dahi deyn-i mezkûru taleb ederse ben edâ edeyim deyicek gıbbe’t-tasdîki’ş-şer‘iyyi’l-vicâhî vâki‘ü’l-hâl merkūm zimmîler talebiyle ketb olundu. Fi’l-yevmi’s-sâmin ve’l-ışrîn min Şa‘bâni’l-mu‘azzam min şühûr li sene isneteyn ve seb‘în ve elf. Şuhûdü’l-hâl: Dilli Mehmed Efendi, İbrahim Bey b. Abdullah el-Cündî, Mehmed Çelebi Lihanalı, Derviş Beşe es-Sarac, el-Hâc Ali Yorganî ve gayruhüm mine’l-hâzırîn.