Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 139 Hüküm no: 119 Orijinal metin no: [26a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikite v. Dimo’nun bağını Yanaki v. Manolo’ya satıp bazı emlâkinin de tasarruf hakkını devretmesi Vilâyet-i Rumeli’nde Mizistre kazâsına tâbi‘ Lankanik nâm karye zimmîlerinden Nikite v. Dimo nâm zimmî mahfil-i şer‘de işbu râfi‘ü’l-vesîka Yanaki v. Manolo nâm zimmî tarafından ikrâr-ı âti’z-zikri tasdîke vekîl olup bimâ hüve nehci’s-sübût şer‘an vekâleti sâbite olan Şinavsi v. Zormal nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden karye-i mezbûre bağları dâhilinde bir tarafdan Nerodso v. Anganikos bağı ve bir tarafdan Galisimo bağı ve bir tarafdan merkūm Yanaki ve bir tarafdan Kostantin v. Petro bağları ile mahdûd tahmînen bir dönüm bir kıt‘a bağımı ki mukaddemâ Simo Nikola’dan iştirâ eylemişdim cemî‘ tevâbi‘ ve levâhıkı ile mersûm Yanaki’ye on kıt‘a riyâlî guruş-ı kebîre tarafeynden îcâb ve kabûlü [hâvî] bey‘-i bâtt-ı sahîh-i kat‘î bâtten bey‘ ve teslîm, ol dahi minvâl-i muharrer üzre iştirâ ve kabûl eyledikden sonra karye-i mezbûre sınırı dâhilinde vâki‘ tefvîz-i âti’z-zikrin sudûruna değin zabt ve tasarrufumda olup mukaddemâ mersûm Simo Nikola’dan tefevvüz eylediğim ma‘lûmetü’l-hudûd ve’l-kıta‘ ve’l-mikdâr tarlalarımın dahi hakk-ı tasarruflarını ma‘rifet-i sâhib-i arz ile müvekkil-i merkūm Yanaki’ye ma‘rifet-i sâhib-i arz ile olan on kıt‘a riyâlî guruş bedel mukābelesinde tefvîz bi’l-ferâğ eylediğimde ol dahi vech-i muharrer üzre tefevvüz ve kabûl edip. semen-i mezbûr ile bedel-i merkūm cem‘an yirmi kıt‘a riyâlî guruşu tamamen müvekkil-i merkūm Yanaki yedinden alıp kabz edip bağ-ı mezkûr ile merkūm Simo Nikola’dan tefevvüz eylediğim tarlaları mahallinde zabt ve tasarrufa tarafımdan müvekkil-i mezbûru taslît eyledim dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min şehri Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Hasan Beşe b. Ferhad, Abdülkādir b. Muhyi, Mehmed Beşe b. Sinan er-Râcil, Hüseyin Muhzır, Dilâver muhzır ve gayruhüm mine’l-hâzırîn.