Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 140 Hüküm no: 120 Orijinal metin no: [26b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Mihal’in evini Ahmed Beşe b. Abdullah’a satması Havâss-ı Kostantıniyye kazâsı iktâ‘ından kasaba-i Çatalca’da Papa Anastaş mahallesinde sâkin Yorgi v. Mihal nâm zimmî meclis-i şer‘de işbu bâ‘isü’l-kitâb Ahmed Beşe b. Abdullah nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden mahalle-i mezbûrede vâki‘ bir tarafdan kasab İsar mülkü ve bir tarafdan ba‘zan Pazarcı Yorgi ve ba‘zan Hasarma nâm nasrâniye mülkü ve iki tarafdan tarîk-i âm ile mahdûd üç bâb fevkānî oda ve altında ahırı ve Horasancı değirmeni ve zât-ı eşcâr-ı müsmire ve gayr-ı müsmire bahçe ve kenîfi ve tarafında bir bâb bakkal dükkânını müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık on bir bin fıddî nakd-i râyic fi’l-vakt akçeye mezbûr Ahmed Beşe’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve ve teslîm, ol dahi vech-i muharrer üzre iştirâ ve tesellüm ve kabûl edip semeni olan mezbûrü’n-na‘t on bir bin akçeyi tamamen müşterî-i mezbûr Ahmed Beşe yedinden alıp kabz eyledim ba‘de’l-yevm menzil-i mahdûd-ı mezkûrda benim vechen mine’l-vücûh alâkam kalmadı. Müşterî-i mezbûrun mülk-i mahz-ı müşterâsı ve hakk-ı sarîhidir. Keyfe mâ yeşâ’ mutasarrıf olsun dedikde gıbbe’t-tasdîki’ş-şer‘iyyi’l-vicâhiyyi’l-mu‘teber mâ hüve’l-vâki‘ bi’t-taleb kayd şüd. Fi’l-yevmi’s-sâmin ve’l-ışrîn min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Beşir Ağa b. Hüseyin, Hüseyin Beşe b. Abdullah Solakzâde, İbrahim Beşe b. Hüseyin er-Râcil, Ömer Beşe b. Hüseyin er-Râcil, Mehmed b. Mustafa, Ahmed Bey b. Hüseyin, Dilâver Muhzır ve gayruhüm mine’l-hâzırîn.