Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 140 Hüküm no: 121 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hayrunnisâ bt. İsmail’in evini Mustafa b. Ramazan’a satması Medîne-i Hazret-i Ebâ Eyyûb-i Ensârî -dâme rıdvânü’l-Bârî-’de Davud Ağa mahallesi sâkinelerinden Hayrunnisâ bt. İsmail nâm hâtun tarafından bey‘-i âti’z-zikri ve kabz-ı semeni ikrâra vekîl olup mezbûrenin zâtını ma‘rifet-i şer‘iyye ile ârifân olan Hüseyin b. Murad ve Dilâver b. Abdullah nâm kimesneler şehâdetleriyle şer‘an vekâleti sâbite olan Havva bt. ( ) nâm hâtun meclis-i şer‘-i şerîfde işbu sâhibü’l-kitâb Mustafa b. Ramazan nâm kimesne mahzarında ikrâr ve takrîr-i kelâm edip müvekkilim mezbûrenin akd-i âti’z-zikrin sudûruna değin silk-i mülk-i sahîhimde münselik ve semt-i zabt-ı tasarrufunda münharıt olan emlâkinden mahalle-i mezbûrede vâki‘ iki tarafdan mahalle-i mezbûre müezzinine mevkūfe menzil ve bir tarafdan el-Hâc İbrahim b. Mustafa mülkü ve bir tarafdan tarîk-i âm ile mahdûd iki bâb fevkānî oda ve bir fevkāniyye sofa ve tahta-pûş ve bir fevkānî kiler ve bir tahtânî oda ve bi’r-i mâ ve kenîfi ve zât-ı eşcâr-ı müsmire ve gayr-ı müsmire cüneyneyi müştemil mülk menzilini cemî‘ tevâbi‘ ve levâhıkı ve âmme-i menâfi‘ ve merâfıkı ile mezbûr Mustafa Beşe’ye yirmi bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm, ol dahi vech-i muharrer üzre iştirâ ve tesellüm ve kabz ve kabûl edip semeni olan mezbûrü’n-na‘t yirmi iki bin akçeyi tamamen müvekkilem mezbûre müşterî-i mezbûrun yedinden alıp kabz edip menzil-i mahdûd-ı mezkûrda benim vechen mine’l-vücûh alâkam kalmadı ba‘de’l-yevm mezbûr Mustafa Beşe’nin mülk-i müşterâsıdır dedi dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Hasan Efendi b. Mansur, Nasuh b. Abdüsselâm, Yusuf Çelebi b. Halil, Mahmud Çelebi b. Ali, Ahmed Çelebi b. Ali ve gayruhüm mine’l-hâzırîn.