Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 141 Hüküm no: 122 Orijinal metin no: [26b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Ağa b. Yusuf’un menzilini Dilâver Ağa b. Abdülmennân’a satması Mahrûse-i Galata’da Bereketzâde mahallesi sükkânından fahrü’l-eşbâh Ali Ağa b. Yusuf meclis-i şer‘-i şerîf-i hatîr-i lâzımü’t-tevkīrde işbu kitâb-ı anberîn-bekānın sâhibi fahrü’l-emâsil ve’l-a‘yân Dilâver Ağa b. Abdülmennân nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden medîne-i Hazret-i Ebâ Eyyûb-i Ensârî -dâme fî rıdvâni’l-Bârî-’de Zal Paşa câmi‘-i şerîfi kurbunda vâki‘ bir tarafdan vakıf menzil ve bir tarafdan Gürcü Mehmed Paşa merhûm bahçesi ve bir tarafdan ba‘zan Fâtıma Hâtun mülkü ve ba‘zan tarîk-i âm ve bir tarafdan dahi tarîk-i âm ile mahdûd muhavvatasını muhtevî olup muhavvata-i dâhiliyyesi tabakāt-ı sülüsü hâvî olup tabaka-i ulyâda bir kasr-ı âlî ve tahtında üç bâb oda ve tabaka-i vustâda iki bâb oda ve iki matbah ve bir kiler ve tabaka-i süflâda bir su kuyusu ve üç kıt‘a seddi ve üç kenîfi müştemil ve muhavvata-i hâriciyyesi iki bâb ulvî oda ve bir sofa ve bir su kuyusu ve bir ahırı ve hadîka-i zât-ı eşcâr-ı müsmire ve gayr-ı müsmireyi müştemil mülk menzilimi cemî‘ tevâbi‘ ve levâhıkı ile müşârün-ileyh Dilâver Ağa’ya yüz doksan bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i kat‘î ile bâtten bey‘ ve teslîm, ol dahi vech-i muharrer üzre iştirâ ve tesellüm ve kabz ve kabûl edip semeni [27a] olan meblağ-ı mezbûr mezbûrü’n-na‘t doksan bin akçeyi tamamen müşterî-i mûmâ-ileyh Dilâver Ağa yedinden alıp kabz eyledim ba‘de’l-yevm menzil-i mahdûd-ı mezkûrda vechen mine’l-vücûh sebeben mine’l-esbâb alâkam kalmadı. Müşârunileyh Dilâver Ağa’nın mülk-i müşterâsı ve hakk-ı sarîhidir. Keyfe mâ yeşâ’ ve hasbe mâ yahtâr mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ bi’l-ibtigā sebt olundu. Fi’l-yevmi’l-hâmis ve’l-ışrîn min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Umdetü’l-müderrisîni’l-kirâm Mollazâde Hasan Efendi, İsmail Emiri b. Rüstem, Himmet Beşe b. Mehmed el-Hallâk, el-Hâc Dilâver b. Abdullah, Osman Ağa b. Hüseyin, Mehmed Efendi b. Ahmed.