Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 142 Hüküm no: 123 Orijinal metin no: [27a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb Beşe b. Abdullah ile karısı Gülistan bt. Abdullah’ın köleleri Yusuf’u âzat etmeleri Medîne-i Hazret-i Ebâ Eyyûb-i Ensârî -dâme rıdvânü’l-Bârî-’de vâki‘el-Hâc Hüsrev mahallesi sükkânından Receb Beşe b. Abdullah ve zevcesi Gülistan bt. Abdullah nâm hâtun meclis-i şer‘-i şerîfde mezbûrânın ale’l-iştirâk abd-i memlûkü olup kendilere rıkk-ı sâbıkını mu‘terif olan işbu orta boylu gök elâ gözlü sarışın müslimiyyü’l-mille hâfızü’l-vesîka Yusuf b. Abdullah nâm şâbb-ı emred gulâm mahzarında, her biri bi’t-tav‘ ve’r-rızâ ikrâr ve takrîr-i kelâm edip ale’l-iştirâki’s-seviy abd-i memlûkümüz gulâm-ı mevsûf-ı mezbûru hasbeten lillâhi te‘âlâ haseneten li rûhi resûlihi’l-mu‘allâ cümle malımızdan ifrâz ve i‘tâk ve tahrîr edip zümre-i ahrâr-ı asliyyîne ilhâk ve idrâc eyledik min ba‘d mevsûf-ı mezbûr Yusuf üzerinde hakk-ı velâdan gayrı hakkımız bâkī kalmadı ba‘de’l-yevm sâir ahrâr-ı asliyyîn gibi hür oldu dediklerinde hâkim-i muvakki‘-i sadr-ı kitâb tûbâ-lehû ve hüsnü me’âb hazretleri kıbelinden sıhhat-i ıtk-ı mezkûra hüküm birle mâ cerâ bi’t-taleb kayd şüd. Fi’l-yevmi’t-tâsi‘ ve’l-ışrîn min şehri Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Ali Çelebi b. Ahmed es-Sarac, Osman Çelebi b. Ahmed el-Müezzin, Receb Beşe b. Bayram, Hüseyin Beşe b. Hasan, Mehmed Çelebi b. Receb, Mustafa Çelebi b. Mehmed ve gayruhüm mine’l-hâzırîn.