Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 143 Hüküm no: 124 Orijinal metin no: [27a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. İbrahim ve Osman b. Mehmed’in köle hususunda Eyüb zâbiti Ali Ağa ile davalı olması Mahrûse-i Galata kazâsı tevâbi‘inden kasaba-i Kasımpaşa’da Sinan Paşa mahallesinde sâkin râfi‘ü’l-kitâb Ahmed Çelebi b. İbrahim ve Osman b. Mehmed nâm kimesneler meclis-i şer‘de medîne-i Hazret-i Ebâ Eyyûb-i Ensârî’de hâlâ zâbitü’l-vakt olan Ali Ağa mahzarında her biri üzerine takrîr ve da‘vâ edip târih-i kitâbdan bir gün mukaddem mülkümden işbu uzun boylu parmaksız kumral bıyıklı Semen nâm nasrâni gulâm ile orta boylu açık kaşlı sivri burunlu Mülâyim nâm câriyem ibâk eylemişler iken, hâlâ gulâm-ı mezkûr ve câriye-i mevsûfu zâbit-i mersûm yedinden bulmuşuzdur suâl olunup alıverilmek matlûbumuzdur dediklerinde zâbit-i merkūm Ali Ağa gulâm-ı mersûm câriye-i mezbûreye vaz‘-ı yedini ikrâr, lâkin müdde‘iyân-ı mezbûrânın mülkleri olup vech-i muharrer üzre mülklerinden ibâk eylediklerini inkâr ile cevâb vermeğin müdde‘iyân-ı mezbûrândan müdde‘âlarını mübeyyine beyyine taleb olundukda, zikr olunan Kasım Paşa mahallâtından Kulaksız mahallesinde sâkin Ali Beşe b. Yusuf ve Mustafa Beşe b. Hüseyin nâm kimesneler li ecli’ş-şehâde makām-ı kazâya hâzırân olup istişhâd olunduklarında, fi’l-hakīka merkūm Semen müdde‘î-i mezbûr Ahmed Çelebi’nin ve merkūm Mülâyim müdde‘î-i merkūm Osman’ın mülkü olup târih-i kitâbdan bir gün mukaddem mezbûrânın mülklerinden ibâk eyledikleri ma‘lûmumuzdur biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyet-i şerâiti’l-kabûl şehâdetleri makbûle oldukdan sonra gulâm-ı merkūm ve câriye-i merkūmu bey‘ ve yâhud taraf-ı şer‘iyyeden biriyle mülklerinden ihrâc eylemediklerine müdde‘iyân-ı mezbûrâna yemîn teklîf olundukda, anlar dahi alâ vefki’l-mes’ûl half billâhi te‘âlâ etmeğin mûcebiyle mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Musli Çelebi el-Muhtesib, Mehmed b. Mahmud, Bayram Sofu b. Mehmed, Dilâver b. Abdullah, ve gayruhüm mine’l-hâzırîn.