Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 291 Hüküm no: 325 Orijinal metin no: [42a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâl Emîni Ebûbekir Ağa’nın el koyduğu Kaba Kondelko Luka v. Dobre’nin terekesinin üçte birini kardeşi Kirço v. Dobre’ye vermesi Vilâyet-i Rumeli’nde Ruskasrı kazâsına tâbi‘ Karapınar nâm karye ahâlîsinden bâ‘isü’s-sifr Kirço v. Dobre nâm zimmî meclis-i şer‘-i şerîf-i Ahmedî ve mahfil-i dîn-i münîf-i Muhammedî’de mahmiye-i İstanbul’da beytülmâl-i âmme emîni olmağla fi’l-asl karye-i mezbûreden olup vilâyet-i mezbûrede Kızılağaç kazâsına tâbi‘ Gedikli nâm karyede tavattun ettikden sonra sürekçilik ile mahmiye-i mezbûreye gelip Yedikule’de hâlik olan Kaba Kondelko Luka v. Dobre nâm zimmînin vâris-i ma‘rûfu olmamağla terekesine vâzı‘ü’l-yed olan umdetü’l-a‘yân Mahmud Ağa b. Hasan tarafından husûs-ı âti’l-beyâna vekîl olduğu bimâ hüve tarîkü’s-sübût şer‘an sâbit olan Ebûbekir Ağa b. Abdurrahman nâm kimesne mahzarında da‘vâ ve takrîr-i kelâm edip ben hâlik-i mezbûrun li eb karındaşı olup babamız ismi Dobre ve maskat-ı re’simiz zikr olunan Karapınar karyesi olup hâlik-i mezbûrun verâseti li eb kız karındaşımız gāib ani’l-meclis Rago nâm nasrâniye ile bana münhasıra bizden gayrı vârisi yok iken müvekkil-i mezbûr tereke-i hâlik-i mezbûra bi gayrı hakkın vaz‘-ı yed etmişdir suâl olunup tereke-i hâlik-i mezbûrun sülüsânını bana teslîme tenbîh olunmak matlûbumdur dedikde, gıbbe’s-suâl vekîl-i mezbûr müvekkilinin tereke-i hâlik-i mezbûra vech-i mübeyyen üzre vaz‘-ı yedini ikrâr velâkin müdde‘î-i mezbûrun verâsetini inkâr edicek müdde‘î-i mezbûrdan vech-i muharrer üzre verâsetine beyyine taleb olundukda zikr olunan Kızılağaç kazâsına tâbi‘ Demircili nâm karye ahâlîsinden olup bi tarîki’l-müsâfir mahmiye-i mezbûrede Şeyh Ebülvefâ câmi‘-i şerîfi kurbunda sâkin Ahmed b. Mahmud ve vilâyet-i mezbûrede kasaba-i Karinâbâd ahâlîsinden olup bi tarîki’l-müsâfir câmi‘-i mezbûr kurbunda sâkin Mustafa b. Keyvan nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka hâlik-i mezbûr Kaba Kondelko ile müdde‘î-i mezbûr Kirço li eb karındaşlar olup babaları ismi Dobre ve maskat-ı re’sleri zikr olunan Karapınar karyesi olup hâlik-i mezbûrun verâseti müdde‘î-i mezbûr Kirço ile li eb kız karındaşları mezbûre Rago’ya münhasıradır gayrı vârisi ve terekesine âhar müstahak olduğu ma‘lûmumuz değildir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra mûcebince müdde‘î-i mezbûrun vech-i muharrer üzre verâsetine hükm olunmağın tereke-i hâlik üç sehimden iki sehmini müdde‘î-i mezbûra teslîme mezbûr Ebûbekir Ağa’ya tenbîh olunmağın mâ vaka‘a bi’t-taleb ketb olundu. Hurrire fi’l-yevmi’s-sâlis ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Fahrü’l-akrân Eyüb Ağa b. Ahmed, fahrü’l-eşbâh Şaban Ağa Se-rmuhzırân, Mehmed Çelebi b. Abdülmennân, Hasan Çelebi b. Ahmed ve gayruhüm.