Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 143 Hüküm no: 125 Orijinal metin no: [27a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasköy kasabasındaki yahudi hafriyatçıların ölülerine ücretsiz olarak mezar kazdıklarından talep olunan vergiye katılmamaları gerektiği Havâss-ı Aliyye kazâsına tâbi‘ kasaba-i Hasköy’de vâki‘ yahudi kabri haffârlarından olup Kirüz cemâ‘atinden Yasef v. İsak ve Kaplan cemâ‘atinden Avraham v. Yasef ve Portakal cemâ‘atinden Arslan v. Matatye ve Aragon cemâ‘atinden Benyamin v. Avraham ve Sinyora cemâ‘atinden Yako v. İsak ve sâirleri bi ecma‘ihim meclis-i şer‘de her biri takrîr-i kelâm edip biz zikr olunan cemâ‘atlerimizde vâki‘ olan mürdelerimize bilâ-ücret makbere hafr eylediğimiz ecilden kasaba-i mezbûre ehl-i sûku işbu sene-i mübârekede tahsîli fermân olunan sürsat zahîresinden kendilere tahmîl olunan zahîre bahâsından bize imdâd eylen deyû dâimâ bizi rencîdeden hâlî değillerdir bâ husûs kasaba-i mezbûrede olan Rum ve Ermeni haffârları ücret ile hafr ederlerken bu makūle teklîf ile rencîde olunmazlar iken biz rencîde olunmak hayfdır. Husûs-ı mezbûre vukūf ve şu‘ûru olan bî-garaz müslümanlardan vâki‘ hâl istihbâr olunup haberleri tahrîr olunmak matlûbumuzdur dediklerinde yine kasaba-i mezbûrede vâki‘ Turşucuzâde mahallesi imâmı Ali Efendi [27b] b. el-Hâc Ramazan ve müezzini Mehmed Çelebi b. Mehmed ve Pîrî Paşa imâmı Ömer Halîfe ve es-Seyyid Mustafa Çelebi b. Mehmed ve Mehmed Bey b. Abdullah ve Fazlı Bey b. Abdullah ve diğer Mehmed Bey b. Abdullah ve İbrahim b. Abdullah nâm kimesneler ve sâir cemm-i gafîr ve cemm-i kesîr li ecli’l-ihbâr meclis-i şer‘de hâzırûn olup isre’l-istihbâr, fi’l-hakīka merkūmûn haffârlar cemâ‘atlerinden vâki‘ olan mürdelerine makbereyi bilâ-ücret hafr edip ol mukābelede bir akçe ve bir habbe almadıkları mukarrer ve muhakkakdır ve kasaba-i mezbûrede olan Rum ve Ermeni haffârları ücret ile hafr ederler ki bu makūle teklîf ile kat‘â rencîde olunmamışlardır deyû her biri haber verdiklerinde vâki‘ü’l-hâl merkūmûn yahudiler talebiyle ketb ve tahrîr olundu. Fi’l-yevmi’s-sâbi‘ min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Receb Bey Kethüdâ, Hamza Efendi el-Kadı, Mehmed Beşe Çukadâr, Dilâver Muhzır, Hüseyin el-Muhzır ve gayruhüm mine’l-hâzırîn.