Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 144 Hüküm no: 126 Orijinal metin no: [27b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Andriye’nin bağ ve tarlalarını Anastaş Manastırı Vakfı’na satması Vilâyet-i Rumeli’nde Mora sancağında Kalavrita kazâsına tâbi‘ Çörente nâm karye sâkinlerinden Nikola v. Andriye nâm zimmî meclis-i şer‘-i şerîfde işbu râfi‘ü’s-sifr Papa Simo v. Nikefori nâm râhib muvâcehesinde tav‘an ikrâr ve takrîr-i kelâm edip mârrü’z-zikr Kalavrita kazâsında Anastaş Manastırı evkāfı’na merkūm Papa Simo mütevellî olmağla li sene semânîn ve hamsîn ve elf Cemâziyelevveli’nin on dokuzuncu günü yine karye-i mezbûre sınırı dâhilinde vâki‘ mevâzi‘-i adîdede inde’l-ahâlî ve’l-cîrân ma‘lûmetü’l-hudûd ve’l-mikdâr on kıt‘a tarlalarımın hakk-ı tasarruflarını ma‘rifet-i sâhib-i arz ile mütevellî-i vakf-ı mezbûr Papa Simon’a tâmmü’l-vezn kırk kıt‘a riyâlî guruşa tefvîz bi’l-ferâğ eylediğimde ol dahi vech-i muharrer üzre vakf-ı mezbûr malıyla tefevvüz ve kabûl edip bedel-i ferâğ olan mezbûrü’n-na‘t kırk guruş mâl-ı vakf-ı mezbûrdan olmak üzre tamamen mütevellî-i mezbûr yedinden alıp kabz edip târih-i mezbûrda Havâss-ı Aliyye kazâsı mahkemesinde nâibü’ş-şer‘ olan Nuh Efendi huzûrunda hüccet-i şer‘iyye olunup ve yine karye-i mezbûre kurbunda Kornefetya nâm mevzi‘de bir tarafdan müşterî-i mezbûr bağı ve bir tarafdan Çörenteoğlu Nikola bağı ve bir tarafdan Yorgi tarlası ve bir tarafdan İspilyot tarlası ile mahdûd tahmînen yirmi beş çap[a]lık bir kıt‘a mülk bağımı cemî‘-i tevâbi‘ ve levâhıkı ile merkūm Papa Simo’ya li sene isneteyn ve hamsîn ve elf şehri Rebî‘ulevvel’inin yirmi yedinci günü on sekiz kıt‘a riyâlî guruşa bâtten bey‘ edip ol dahi vech-i muharrer üzre iştirâ ve kabûl eylediğinden sonra semeni olan mezbûrü’n-na‘t on sekiz kıt‘a riyâlî guruşu tamamen merkūm Papa Simo yedinden alıp kabz edip târih-i mezbûrda medîne-i Ebâ Eyyûb-i Ensârî’de hâlâ mütevellî olan Hasan Efendi b. el-Hâc İshak huzûrunda hüccet olundukdan sonra zikr olunan bağ ve tarlaları gāib ani’l-meclis Ali Ağa nâm kimesneye semen-i ma‘lûm ve bedel-i ma‘lûm mukābelesinde fazlen bey‘ ve tefvîz ve kabz-ı semen ve bedel eylemişdim lâkin mezbûr Papa Simo husûs-ı mezbûrda mezbûr Ali Ağa’dan taleb ve da‘vâ ve kendiden mukaddem bey‘ ve tefvîzi muvâcehesinde işâret ve yedine hüccet-i şer‘iyye almağın hâlâ zikr olunan bağ ve tarlalarım merkūm Papa Simo’nun mülkü ve dâhil-i taht-ı tasarrufu olmuşdur. Benim alâkam yokdur. Mezbûrun yedinde olan hüccet-i şer‘iyyeler benim ikrârım ile muvâcehemde olmuşdur deyû tav‘an ikrâr ve i‘tirâf etmeğin gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Mehmed Beşe Çukadâr, Dilâver b. Abdullah, Hüseyin b. Hasan, Receb Bey b. Numan, Mehmed b. Mahmud ve gayruhüm mine’l-hâzırîn.