Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 145 Hüküm no: 127 Orijinal metin no: [27b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Dimitri’ye alacak iddiasını ispat için süre verilmesi Vilâyet-i Anadolu’da Yalakābad kazâsında sâkin değirmenci tâifesinden Todori v. Dimitri nâm zimmî mahfil-i kazâda bostancı tâifesinden Polihroni v. Panayot mahzarında üzerine takrîr ve da‘vâ edip târih-i kitâbdan altı ay mukaddem mezbûr Polihroni’ye bi tarîki’l-vedî‘a her birinde ikişer ve kırkar guruşun altışar ve ba‘zısı yedişer dirhem iki bileziğim ile cem‘an dört yüz seksen guruş ile mâî ibrişim kese ile dört bin akçemi mezbûr Polihroni[’den] taleb ederim suâl olunup alıverilmek matlûbumdur dedikde gıbbe’s-suâl merkūm Polihroni husûs-ı mezbûru bi’l-külliyye inkâr ile cevâb vermeğin müdde‘î-i mezbûrdan da‘vâsına mutâbıka beyyine taleb olundukda, ikāmet-i beyyine için târih-i kitâbdan on gün tamâmına değin taraf-ı şer‘den merkūm Polihroni’nin nefsine ve hîn-i mütâlebe[de] meclis-i şer‘a ihzârına târih-i [28a] kitâbdan on gün tamâmına değin emr [ve] kabûlü hâviye kefâlet ile Receb Beşe b. Abdullah ve Kiryaki v. Polihroni kefîl olduklarında, mâ hüve’l-vâki‘ hıfzan li’l-makāl bi’l-ibtigā sebt olundu. Fî selhi Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Ahmed Bey b. ( ) el-Cündî, Kenan Bey b. Abdullah, Mehmed Çelebi b. Musli, Musli Bey b. Abdullah, Hüseyin b. Hasan ve gayruhüm mine’l-hâzırîn.