Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 146 Hüküm no: 128 Orijinal metin no: [28a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mısır Beylerbeyi Abdurrahman Paşa Vakfı’na ait menzilin Receb Bey b. Ali’ye satılması Ebâ Eyyûb-i Ensârî -dâme rıdvânü’l-Bârî-’de Câmi‘-i Kebîr mahallesi sâkinlerinden fahrü’l-a‘yân Siyavuş Bey b. Abdülmennân meclis-i şer‘de işbu râfi‘ü’l-kitâb Receb Bey b. Ali nâm kimesne mahzarında ikrâr ve takrîr-i kelâm edip sâbıkan Mısır beylerbeyisi olup medîne-i mezbûre kolluğu mukābelesinde medfûn olan Abdurrahman Paşa merhûmun evkāfına ben mütevellî olmağla bundan akdem mahalle-i mezbûrede vâki‘ bir tarafdan ba‘zan Câmi‘-i Kebîr imâmlarına meşrûta olan vakıf menzil ve ba‘zan Cafer Çelebi veresesi mülkleri ve bir tarafdan Halil Çelebi b. Mehmed mülkü ve ba‘zan Medîne-i Münevvere vakfı ve taraf-ı âharı tarîk-i hâs ile mahdûd iki bâb fevkānî ve üç bâb tahtânî odaları ve üç sofayı ve bir su kuyusunu ve havluyu ve kenîfi müştemil olan menzili vakf-ı mezbûra akār olmak için kendi re’yimle mâlikinden kırkbeş akçeye iştirâ ve kabz etmişdim el-hâletü hâzihî menzil-i mezbûr mürûr-ı eyyâm ile harâb ve mâil-i türâb olup hâsılı harcına vefâ etmemeğin semen-i misli ile âhara bey‘ ve semenini kabz ve istirbâh olunmak vakfa enfa‘ idiği ahbâr-ı sikāt ile hâkim-i muvakki‘-i sadr-ı kitâb hazretleri indinde müte‘ayyin olmağla ber minvâl-i muharrer bey‘ için bana izin ve icâzet vermekle ben dahi menzil-i mahdûd-ı mezkûru sûk-ı sultânîde mecma‘-ı nâs olan mevâzi‘de nidâ ve müzâyede ettirdip ba‘de inkıtâ‘i’r-rağbe mezbûr Receb Bey üzerinde elli bin akçede karâr edip ziyâde ile tâlib-i âhar zuhûr etmemeğin ben dahi velâyetim hasebiyle menzil-i mezbûru cemî‘ tevâbi‘ ve levâhıkı ile elli bin nakid akçeye bâtten bey‘ ve teslîm, ol dahi minvâl-i muharrer üzre iştirâ ve tesellüm ve kabz ve kabûl edip semeni olan mezbûrü’n-na‘t elli bin akçeyi tamamen vakf-ı mezbûr için tevliyyetim hasebiyle alıp kabz edip menzil-i mezbûrda kat‘â alâkam kalmadı. Mezbûr Receb Bey’in mülk-i mahz-ı müşterâsı ve hakk-ı sarîhidir. Keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fî gurreti şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mehmed Efendi b. Nasuh, Mehmed Beşe b. Hasan, el-Hâc Ali b. Abdullah, İbrahim Çelebi b. Mehmed, el-Hâc Ebûbekir b. Hasan, Mehmed Çelebi b. Ahmed, Ahmed Bey el-Cündî, Ali Çelebi b. Hasan.