Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 147 Hüküm no: 129 Orijinal metin no: [28a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime bt. Abdullah’ın eşyalarını ve mehrini kocası Mehmed Çelebi b. Hacı Osman’a bağışlaması Havâss-ı Aliyye kazâsı tevâbi‘inden kasaba-i Hasköy mahallâtından Sütlüce mahallesinde sâkine Rahime bt. Abdullah nâm hâtun kıbelinden kaziyye-i âti’z-zikri ikrâra vekîl olup mezbûrenin zâtını ma‘rifet-i şer‘iyye ile ârifân olun Hasan Çelebi b. Mehmed ve Ali Beşe b. Musli şehâdetleriyle şer‘an vekâleti sâbite olan fahrü’l-müderrisîni’l-kirâm Ahmed Efendi b. Ali meclis-i şer‘de müvekkilesi mezbûrenin zevci sâhibü’l-kitâb Mehmed Çelebi b. el-Hâc Osman mahzarında bi’l-vekâle ikrâr ve takrîr-i kelâm edip müvekkile-i mezbûre Rahime silk-i mülk-i sahîhimde münselik olan emlâkinden bir döşek ve bir minder ve iki aded kumaş ve bir yemeni yorgan ve bir çarşaf ve yüz yastığı ve bir yan keçesi ve bir tas ve iki sahan ve bir demir sini ve bir sepet sandığı ve bir ibrik ve bir Yanbolu kebesi ve zevci mezbûr zimmetinde mütekarrir olan üç bin akçe mehr-i müeccelinin bin beş yüz akçesini dahi mezbûr Mehmed Çelebi’ye hibe-i sahîh-i şer‘iyye ile hibe temlîk ve teslîm edip ol dahi vech-i muharrer üzre ittihâb ve temellük ve tesellüm ve kabz ve kabûl eyledi min ba‘d zikr olunan eşyâ ve mehr-i müeccelimden dahi bin beş yüz akçesi zevcim mezbûrun emlâk-i mevhûbesidir. Keyfe mâ yeşâ’ mutasarrıf olsun dedi dediklerinde gıbbe’s-suâl vâki‘ü’l-hâl kayd şüd. Li sene isneteyn ve seb‘în ve elf. Şuhûdü’l-hâl: Fahrü’l-kuzât Ahmed Efendi b. Yusuf, Mehmed Efendi b. Mehmed et-Tabîb, Mehmed Çelebi b. Mehmed el-Müezzin, Süleyman Efendi b. Mehmed el-İmâm, Mehmed Çelebi b. Osman ve gayruhüm mine’l-hâzırîn.