Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 148 Hüküm no: 131 Orijinal metin no: [28b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ağzı bozuk olan Sâliha ve Fâtıma’nın mahalleden çıkarılması Medîne-i Hazret-i Ebâ Eyyûb-i Ensârî -dâme rıdvânü’l-Bârî-’de vâki‘ Servi mahallesi imâmı olan Hasan Efendi b. İbrahim ve müezzini olan Mehmed Halîfe b. Hasan ve mahalle-i mezbûre ahâlîsinden Derviş Halil b. Mustafa ve Mehmed b. Yusuf ve Ömer b. Osman ve Abdullah b. Mehmed ve İbrahim b. Mehmed ve sâirleri bi ecma‘ihim mahfil-i kazâda yine mahalle-i mezbûre sâkinelerinden Sâliha ve Fâtıma kendi hâllerinde olmayıp her bâr fesâd üzre oldukları ecilden mahallemizde bir fesâd olur deyû havfımızdan mezbûretân Sâliha ve Fâtıma’ya kendi hâlinizde olun dediğimizde her birimize lisânları ile nice türlü şetm ederler mezbûretânın lisânlarından müte’ezzî ve müte’ellimleriz fi’l-hakīka mezbûretâna bu hâl üzre bunca zamân dahi kalırsa mahallemizde bir fesâd olmak emr-i muhakkakdır mezbûretân Sâliha ve Fâtıma’nın mahalle-i mezbûreden ihrâcları için kıbel-i şer‘den tenbîh olunmak matlûbumuzdur dediklerinde mezbûretân Sâliha ve Fâtıma bed-zebân olup kendi hâllerinde olmadıklarını zeyl-i kitâbda muharrerü’l-esâmî olan sikāt-ı müslimîn alâ tarîki’ş-şehâde haber verdiklerinde mezbûretân Sâliha ve Fâtıma mahalle-i mezbûreden ihrâc olunmak üzre kıbel-i şer‘den mezbûretân Sâliha ve Fâtıma’ya tenbîh birle mâ hüve’l-vâki‘ bi’t-taleb kayd şüd. Fî gurreti Ramazâni’l-mübârek li sene isneteyn ve seb‘în ve elf. Şuhûdü’l-hâl: Mehmed Beşe b. Yusuf, Ömer Beşe b. Osman, Abdullah Beşe b. Mehmed, İbrahim Beşe b. Mehmed, Hüseyin Çelebi b. Ali ve gayruhüm mine’l-hâzırîn.