Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 149 Hüküm no: 132 Orijinal metin no: [28b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahudi İlyazer v. İsak’ın Balatlı yahudi Komye’ye inci borcu olması Havâss-ı Aliyye kazâsına tâbi‘ kasaba-i Hasköy’de Kiremitçi Ahmed Çelebi mahallesinde sâkin yahudi tâifesinden olup Edirne cemâ‘atinden İlyazer v. İsak nâm yahudi mahfil-i kazâda mahmiye-i İstanbul’da Balat kurbunda vâki‘ Tahta Minâre mahallesi sâkinelerinden râfi‘ü’l-vesîka Komye nâm yahudi muvâcehesinde bi’t-tav‘ ve’r-rızâ ikrâr ve i‘tirâf edip mezbûr Komye’nin yedinden cinsi ve kadri beynimizde ilm-i şer‘î birle ma‘lûm yüz miskāl inci semeninden her bir miskāl altışar dirhem guruş olmak üzre dörder buçuk kıt‘a riyâlî kebîr guruş ki cem‘an dört yüz elli kıt‘a riyâlî kebîr guruş olup meblağ-ı mârrü’z-zikr guruşu târih-i kitâbdan doksan gün tamâmına [29a] değin müeccel ve mev‘ûd zimmetimde lâzımü’l-edâ ve vâcibü’l-kazâ deynimdir deyicek gıbbe’t-tasdîki’l-mu‘teber mukırr-ı mezbûr İlyazer’in zevcesi hâzıre bi’l-meclis Hodabula? bt. Mihayil nâm yahudi meblağ-ı mezbûr mârrü’z-zikr dört yüz elli kıt‘a riyâlî kebîr guruş emr ve kabûlü hâviye kefâlet-i sahîha-i şer‘iyye ile kefîl olmağın mâ hüve’l-vâki‘ bi’t-taleb ketb olundu. Şuhûdü’l-hâl: Hüseyin Çelebi b. Ali, çukadâr Mehmed Çelebi b. Ahmed, Dilâver Bey b. Abdullah, Kuruçeşme cemâ‘atinden Avraham v. Yani, yine? cemâ‘atinden Kemal v. Saldık ve gayruhüm mine’l-hâzırîn.