Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 150 Hüküm no: 133 Orijinal metin no: [29a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arşuvânî Mehmed Bey’in karısı Ümmühâni bt. Hasan Paşa’yı şartlı boşaması Medîne-i Hazret-i Ebâ Eyyûb-i Ensârî -dâme rıdvânü’l-Bârî-’de Mehmed Bey mahallesi sâkinelerinden kıdvetü’l-muhadderât zübdetü’l-muvakkarât Ümmühâni Hanım bt. el-merhûm Hasan Paşa kıbelinden husûs-ı âti’z-zikre vekîl olup mûmâ-ileyhânın zâtını ma‘rifet-i şer‘iyye ile ârifân olan Sâlih Mehmed Efendi b. Mustafa şehâdetleriyle şer‘an vekâleti sâbite olan hazînedâr Hüseyin Ağa b. Mustafa meclis-i şer‘de bi’l-vekâle ikrâr ve takrîr-i kelâm edip müvekkilem müşârün-ileyhânın zevci Arşuvânî Mehmed Bey bin yetmiş Zilka‘de’si gurresinde zevcesi müşârün-ileyhâ Ümmühâni Hanım’a şuhûd mahzarında vilâyet-i Anadolu’da hısn-ı Mansûr’da olan ma‘lûme iki câriyeyi İbrahim Bey ile irsâl edip bana üç aya değin vâsıl olmaz ise benden boş ol deyû şart ve tatlîk etmişiken bu âna değin ol câriyeler müvekkilem müşârün-ileyhâya vâsıl olmadığından mâ‘adâ ba‘zı kimesneler müvekkilem mûmâ-ileyhâya zevcin seni tatlîk etmişdir deyû haber vermişlerdir el-hâletü hâzihî husûs-ı mezbûra vukūf ve şu‘ûru olup ol meclisde hâzır olan kimesnelerden istihbâr olunup haberleri tahrîr olunmak bi’l-vekâle matlûbumdur deyicek mahmiye-i İstanbul’da Canbâziye mahallesinde sâkin fahrü’l-akrân Süleyman Çelebi b. Mehmed ve Mustafa Ağa b. Abdullah nâm kimesneler li ecli’l-ihbâr hâzır bi’l-meclis olup istihbâr olunduklarında, fi’l-hakīka mezbûr Mehmed Bey zevcesi müşârün-ileyhâ Ümmühâni Hanım’a minvâl-i muharrer üzre hısn-ı Mansûr’da olan ma‘lûmetü’l-ism iki câriyeyi İbrahim Bey ile irsâl edip bana üç aya değin vâsıl olmaz ise benden boş ol deyip bizim huzûrumuzda şart ve ta‘lîk edip ile’l-ân ol câriyeler vâsıl olmamağla müvekkile-i müşârün-ileyhâ mezbûr Mehmed Bey’den mutallaka olmuşdur deyû alâ tarîki’ş-şehâde haber vermeğin vâki‘ü’l-hâl müşârün-ileyhâ talebiyle ketb olundu. Fi’l-yevmi’s-sânî min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Hüseyin b. Ali, Receb Beşe b. Mustafa, İsâ b. İdris el-Attâr, Mehmed Çelebi b. Mustafa, Mehmed Bey el-Attâr ve gayruhüm mine’l-hâzırîn.