Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 150 Hüküm no: 134 Orijinal metin no: [29a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Yani’nin evini Zaho v. Yani’ye satması Vilâyet-i Rumeli’nde İnebahtı sancağında Yacağaç kazâsı tevâbi‘inden Letüşler nâm karye sâkinlerinden Dimo v. Yani nâm zimmî meclis-i şer‘de işbu râfi‘ü’l-kitâb Zaho v. Yani nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden karye-i mezbûrede vâki‘ bir tarafdan diğer Zaho mülkü ve bir tarafdan hendek ve iki tarafdan tarîk-i âm ile mahdûd bir bâb fevkānî ve bir bâb odaları ve zât-ı eşcâr-ı müsmire ve gayr-ı müsmire bahçeyi müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık iki bin beş yüz fıddî nakd-i râyic fi’l-vakt akçeye mezbûr Zaho’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ edip ol dahi vech-i muharrer iştirâ ve kabûl edip semeni olan meblağ-ı mezbûrü’n-na‘t iki bin beş yüz akçeyi tamamen mersûm Zaho yedinden alıp kabz edip menzil-i mahdûd-ı mezkûru mahallinde zabt ve tasarrufu tarafımdan mesfûr Zaho’yu taslît eyledim ba‘de’l-yevm menzil-i mahdûd-ı mezkûrda benim vechen mine’l-vücûh ve sebeben mine’l-esbâb alâkam yokdur, merkūm Zaho’nun mülk-i mahz-ı müşterâsıdır. Keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’s-sânî min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Hüseyin b. Ali, Mehmed b. Mahmud, Musli el-Muhtesib, Hüseyin b. Hasan ve gayruhüm mine’l-hâzırîn, Niko v. Yorgi, Yani v. Yapoşi, Kosta v. Koliriyani, Yani [v.] Nikozaho.