Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 292 Hüküm no: 326 Orijinal metin no: [42a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden mehterbaşı Mustafa Ağa’nın Bursa zimmîleri cizyesi iltizam bedelini sağlığında Emrullah Ağa’dan tahsil ettiği Mahmiye-i İstanbul’da Kabasakal Sinan Ağa mahallesi ahâlîsinden iken bundan akdem vefât eden mehterbaşı Mustafa Ağa’nın verâseti zevce-i metrûkeleri Âişe bt. Ali ve Nâziki bt. Abdullah ve Sâliha bt. Abdullah nâm hâtunlara ve sulbiye sagīre kızı Fâtıma ve li ebeveyn er karındaşı İlyas Ağa ve li ebeveyn kız karındaşları Cennet ve Fâtıma nâm hâtunlara münhasıra olduğu şer‘an sâbit oldukdan sonra mezbûr İlyas Ağa kendi tarafından asâleten ve kız karındaşları mezbûretân Cennet ve Fâtıma ile mezbûrât Âişe ve Nâziki ve Sâliha taraflarından vech-i âtî üzre ikrâra vekîl olduğu mezbûrâtın zâtlarını ma‘rifet-i şer‘iyye ile ârifân olup mahalle-i mezbûre ahâlîsinden olan el-Hâc Bâli Ağa b. Yakub ve Hacı Hasan b. Abdullah nâm kimesneler şehâdetleri ile şer‘an sâbit oldukdan sonra vekâleten meclis-i şer‘-i şerîf-i Ahmedî ve mahfil-i dîn-i münîf-i Muhammedî’de bâ‘isü’l-kitâb Emrullah Ağa b. Abdullah nâm kimesne mahzarında bi’l-asâle ve bi’l-vekâle ikrâr ve takrîr-i kelâm edip müteveffâ-yı mezbûr hayâtında bin yetmiş dört ve yetmiş beş senelerinde taht-ı iltizâmında olan Bursa zimmîlerinin ziyâde cizyelerini âhara vermeğe me’zûn olmağla mezbûr Emrullah Ağa’ya yirmi üç bin esedî guruşa der-uhde edip mezbûr Emrullah Ağa dahi ba‘de’l-iltizâm ve’l-kabûl seneteyn-i mezbûreteynde mahrûse-i mezbûre zimmîlerinin ziyâde cizyesinden yirmi üç bin esedî guruş cem‘ ve tahsîl edip getirip müteveffâ-yı mezbûra hayâtında teslîm edip müteveffâ-yı mezbûr dahi yirmi üç bin esedî guruşu mezbûr Emrullah Ağa yedinden tamâmen ahz u kabz edip mezbûr Emrullah Ağa yedinde cizye-i mezbûre malından nesne kalmamışidi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Fahrü’l-akrân Ali Ağa b. Abdullah, fahrü’l-emsâl Kazancı demekle şehîr Ahmed Ağa b. Mustafa, fahrü’l-küttâb Mehmed Efendi Halîfe-i rûznamçe-i evvel, Beşir Ağa b. İbrahim, Ömer Ağa b. Mustafa, Hacı Ebûbekir b. Mehmed ve gayruhüm mine’l-hâzırîn.