Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 151 Hüküm no: 135 Orijinal metin no: [29b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musaffa bt. Abdullah’ın ölen kocasından kalan emlâk hususunda Ömer Beşe b. Mehmed ile sulh olması Havâss-ı Aliyye kazâsı tevâbi‘inden Çatalca nâhiyesine tâbi‘ Baba Nakkaş nâm karyede sâkin iken bundan akdem vefât eden Süleyman Beşe nâm râcilin zâhirde zevcesi Musaffâ bt. Abdullah nâm hâtundan gayrı vâris-i ma‘rûf ve ma‘rûfesi olmamağla muhallefâtının rub‘u zevcesi mezbûr Musaffâ’ya selâse-i erbâ‘ı yeniçeri beytülmâline âid ve râci‘ olduğu şer‘an zâhir ve müte‘ayyin oldukdan sonra mezbûre Musaffâ meclis-i şer‘-i şerîfde işbu bâ‘isü’l-kitâb Ömer Beşe b. Mehmed nâm râcil mahzarında ikrâr ve takrîr-i kelâm edip zevcim müteveffâ-yı mezbûrun muhallefâtından karye-i mezbûrda vâki‘ bir tarafdan Bozacı mülkü ve bir tarafdan Yusuf Ağa tarlası ve bir tarafdan vakıf tarlası ve bir tarafı tarîk-i âma müntehî bir fevkānî ve bir tahtânî oda ve bir ahır ve su kuyusu ve hudûd-ı mezkûr dâhilinde bir kıt‘a bağ cümle tevâbi‘ ve levâhık ve âmme-i menâfi‘ ve merâfıkı ile mezbûr Ömer Beşe’ye benim gıyâbımda yeniçeri beytülmâli emîni tarafından muhallefât-ı müteveffâ-yı mezbûr zâbıt memûru olan İslâm Beşe nâm gedikli bey‘ ve teslîm ve kabz edip yedine mülknâme hücceti vermeğin ben dahi menzil-i mezbûru merkūm İslâm Beşe semen-i mislinden noksân-ı fâhişe bey‘ eylemişdir ve bey‘de müzâyede yokdur deyû mezbûr Ömer Beşe’den taleb [ve] da‘vâ eylediğimde beynimizde münâza‘ât-ı kesîre cereyân etmişiken el-hâletü hâzihî beynimize muslihûn tavassut edip da‘vâ-yı mezkûrumdan mezbûr Beşe ile beni beş yüz nakd-i râyic fi’l-vakt akçeye inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan mezbûrü’n-na‘t beş yüz akçeyi tamamen mezbûr Ömer Beşe yedinden alıp kabz edip husûs-ı mezbûre müte‘allik âmme-i de‘âvî ve mütâlebât ve eymân-ı muhâsamâtdan zimmetini ibrâ-i âmm-ı kātı‘ü’n-nizâ‘ ile ibrâ eyledim ba‘de’l-yevm menzil-i mezkûr ve bağ-ı mersûm mezbûr Ömer Beşe’nin mülk-i müşterâsı ve hakk-ı sarîhidir. Keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ kayd şüd. Fi’l-yevmi’r-râbi‘ min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Hüseyin Ağa b. Mustafa, Hüseyin b. Ali, Musli Çelebi el-Muhtesib, el-Hâc Hüseyin ve gayruhüm mine’l-hâzırîn.