Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 152 Hüküm no: 136 Orijinal metin no: [29b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Ramazan’ın hırsızlık suçlamasının reddi Medîne-i Hazret-i Ebâ Eyyûb-i Ensârî -dâme rıdvânü’l-Bârî-’de Nişancı Paşa mahallesinde Ahmed b. Ramazan nâm kimesne meclis-i şer‘-i hatîr-i lâzımü’t-tevkīrde müste’ciresi olan bâ‘isetü’l-kitâb Ayşe bt. Yusuf nâm hâtun mahzarında üzerine takrîr ve da‘vâ edip [mahalle-i] mezbûrede vâki‘ menzilimde müste’cirim olmağla benim ile ma‘an bir menzilde sâkin olmağın târih-i kitâbdan ( ) mukaddem ( ) gün mukaddem işbu yeşil bogasi kîsem içinde hurda ve riyâlî-i kebîr cem‘an dört bin akçemi hafiyyeten ahz eylemişdir hâlâ suâl olunup alıverilmek murâdımdır deyicek gıbbe’s-suâl ve akībe’l-inkâr müdde‘î-i mezbûr Ahmed’den müdde‘âsını mübeyyine beyyine taleb olundukda, ityân-ı beyyineden izhâr-ı acz ile istihlâf etmeğin müdde‘î-i mezbûrun zikr olunan kîse içinde hurda ve riyâlî-i kebîr cem‘an dört bin akçesini hafiyyeten ahz eylemediğine ve âhar yediyle ahz ettirmediğine ve vücûh-ı şer‘den biriyle hükmü lâhık olmadığına mezbûre Ayşe’ye yemîn teklîf olundukda, ol dahi alâ vefki’l-mes’ûl yemîn billâhi te‘âlâ etmeğin mezbûr Ahmed bî-vech ta‘arruzdan men‘ birle mâ hüve’l-vâki‘ bi’t-taleb kayd şüd. Fi’l-yevmi’s-sânî min Ramazâni’l-mübârek li sene isneteyn ve seb‘în ve elf. Şuhûdü’l-hâl: Es-Seyyid Halil Efendi b. es-Seyyid Mahmud, Eyüb Çelebi b. Mehmed el-Mukayyid, Hüseyin b. Ali Muhzır, Dilâver b. Abdullah el-Muhzır ve gayruhüm mine’l-hâzırîn.