Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 152 Hüküm no: 137 Orijinal metin no: [29b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Todori’nin bağlarını Panayot v. Nikola’ya satması Vilâyet-i Rumeli’nde medîne-i Yenişehir iktâ‘ından Kûhistan nâhiyesine tâbi‘ Büyük Kerasun nâm karyeden Dimitri v. Todori meclis-i şer‘de bâ‘isetü’l-vesîka Panayot v. Nikola muvâcehesinde ikrâr ve takrîr-i kelâm edip akd-i âtî sudûruna değin silk-i mülk-i sahîhimde münselik olan emlâkimden karye-i mezbûre sınırı dâhilinde Marmara nâm mevzi‘de vâki‘ birbirine muttasıl bir tarafı müşterî-i mezbûr bağına ve bir tarafı Sergoni bağına ve tarafeyni tarîk-i âma müntehî iki kıt‘a mülk bağlarımı bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık üç bin dokuz yüz fıddî nakd-i râyic fi’l-vakt akçeye merkūm Panayot’a tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ edip ol dahi vech-i muharrer üzre iştirâ ve kabûl eyledikden sonra semeni olan mezbûrü’n-na‘t üç bin dokuz yüz akçeyi tamamen mersûm Panayot yedinden alıp kabz edip zikr olunan [30a] iki kıt‘a bağları mahallinde zabt ve tasarrufa tarafımdan işbu Panayot’u taslît eyledim ba‘de’l-yevm bağ-ı mahdûd-ı mezkûrun ikisi dahi merkūm Panayot’un mülk-i müşterâsı ve hakk-ı sarîhidir. Keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sâlis min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mehmed Beşe b. ( ) Çukadâr, Dilâver Muhzır, Musli Bey el-Muhtesib, Hüseyin Muhzır, Mehmed el-Muhzır.