Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 153 Hüküm no: 138 Orijinal metin no: [30a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mehmed’in Mehmed b. Hasan’dan muhâlaa yoluyla boşanması Medîne-i Hazret-i Ebâ Eyyûb-i Ensârî -dâme rıdvânü’l-Bârî-’de Câmi‘-i Kebîr mahallesinde sâkine Ayşe bt. Mehmed nâm hâtun tarafından hul‘-ı âti’z-zikre vekîl olup mezbûrenin zâtını ma‘rifet-i şer‘iyye ile ârifân olan Mehmed Çelebi b. el-Hâc İlyas Mehmed b. Abdullah şehâdetleriyle şer‘an vekâleti sâbite olan babası mezbûr Mehmed Çelebi meclis-i şer‘de müvekkile-i mezbûrenin zevci bâ‘isü’l-kitâb Mehmed b. Hasan nâm bostânî mahzarında bi’l-vekâle ikrâr ve takrîr-i kelâm edip sulbiye kebîre kızım müvekkile-i mezbûrenin zevci merkūm Mehmed ile beynlerinde şikāk vâki‘ olmağın zimmetinde mütekarrir olan dört bin akçe mehr-i müeccel ve nafaka-i iddet-i mu‘ayyene ve me’ûnet-i süknâsından fâriğa olduğundan mâ‘adâ dört bin nakd-i râyic fi’l-vakt akçe bedel mukābelesinde hul‘ olmak üzre mezbûr Mehmed’e bey‘ ve teslîm, ol dahi kabz eyledikden sonra zevci mezbûr ile muhâla‘a eyleyip zevciyyete müte‘allik âmme-i de‘âvî ve mütâlebât ve eymân ve muhâsamâtdan mezbûr Mehmed’in zimmetini ibrâ-i âmm-ı kātı‘ü’n-nizâ‘ ile ibrâ eyledim dedi dedikde mezbûr Mehmed dahi meclis-i mezbûrda zevcem mezbûre Ayşe ile vech-i muharrer üzre olan hul‘-ı mezbûru kabûl ve bedel-i hul‘ olan mezbûrü’n-na‘t dört bin akçeyi tamamen yedinden alıp mûcebince müte‘allik cemî‘ de‘âvî ve ve mütâlebâtdan ibrâ eyledim deyicek gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-hâmis min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mustafa Beşe b. Mehmed, el-Hâc Ahmed b. Abdullah, Mehmed Beşe b. Mahmud, Üstâd Ahmed el-Bakkal, Siyavuş b. Abdullah ve gayruhüm mine’l-hâzırîn.