Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 154 Hüküm no: 139 Orijinal metin no: [30a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mumculardan Avyori v. Yani’nin Yani v. Polihroni’den alacaklı olması Mumcu tâifesinden işbu râfi‘ü’l-vesîka Avyori v. Yani nâm zimmî mahfil-i kazâda şerîki Yani v. Polihroni nâm zimmî muvâcehesinde üzerine da‘vâ ve takrîr-i kelâm edip şerîkim merkūm Yani zimmetinde mâl-ı şirketden ba‘de külli hesâb sekiz bin akçe hakkım olup taleb eylediğimde edâdan imtinâ‘ eder hâlâ suâl olunup alıverilmek murâdımdır deyicek gıbbe’s-suâl mezbûr Yani cevâbında fi’l-hakīka şerîkim müdde‘î-i mezbûr mâl-ı şirketden altı bin akçe deynim olup altı bin akçenin dahi bin elli akçesini müdde‘î-i mezbûre def‘ ve teslîm edip bâkī dört bin dokuz yüz elli akçe müdde‘î-i mezbûr Mehmed’e lâzımü’l-edâ deynimdir deyicek isre’s-suâl gıbbe’t-talebi’l-beyyine ve’l-acz an ityânihâ mârrü’z-zikr bin elli akçeyi meblağ-ı mezbûrdan ahz ü kabz etmediğine mesfûr Yani’ye yemîn [teklîf] olundukda, ol dahi alâ vefki’l-mes’ûl yemîn billâhi’llezî enzele’l-İncîle alâ İsâ -aleyhi’s-selâm- ettikden sonra müdde‘î-i mezbûr Avyori’den ziyâdeyi mübeyyine beyyine taleb olundukda, yine tâife-i mezbûrdan İspitol v. Harito ve Dimo v. Yani nâm zimmîler li ecli’ş-şehâde makām-ı kazâda hâzırân olup istişhâd olunduklarında, fi’l-vâki‘ işbu târih-i kitâb günü müdde‘î-i mezbûr şerîki mesfûr Yani ile bizim huzûrumuzda hesâb ve kitâb eylediklerinde mezbûr Avyori’nin merkūm Yani zimmetinde sekiz bin akçe hakkı zuhûr edip ol dahi şerîkim mesfûr Avyori mâl-ı şirketden zimmetimde lâzımü’l-edâ sekiz bin akçe deynim vardı deyû huzûrumuzda ikrâr ve bizi işhâd etmişdi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyet-i şerâiti’l-kabûl şehâdetleri makbûl olmağın mûcebiyle meblağ-ı mezbûr sekiz bin akçeyi müdde‘î-i mezbûr edâ ve teslîme mesfûr Yani’ye tenbîh birle mâ hüve’l-vâki‘ kayd şüd. Fi’l-yevmi’l-hâmis min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Hüseyin b. Ali, Geçinür b. Hüseyin, Mehmed b. Mahmud, Bayram Sofu muhzır ve gayruhüm mine’l-hâzırîn.