Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 154 Hüküm no: 140 Orijinal metin no: [30b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Müsliman’ın tarlasının tasarruf hakkını Ali b. Mustafa’ya devretmesi Vilâyet-i Rumeli’nde Paşa sancağında Opar kazâsına tâbi‘ Porato Papas nâm karye sâkinlerinden İbrahim b. Müsliman nâm kimesne meclis-i şer‘-i şerîfde işbu râfi‘ü’l-vesîka Ali b. Mustafa nâm kimesne mahzarında ikrâr ve takrîr-i kelâm edip karye-i mezbûre sınırı dâhilinde Dürlek nâm mevzi‘de vâki‘ bir tarafdan Mehmed tarlası ve bir tarafdan arsa-i hâliye ve bir tarafdan Ahmed tarlası ve bir tarafdan Kezo tarlası ile mahdûd tahmînen altı keyl tohum alır bir kıt‘a tarlanın hakk-ı tasarrufunu ma‘rifet-i sâhib-i arz ile mezbûr Ali’ye iki bin üç yüz nakd-i râyic fi’l-vakt akçeye tefvîz bi’l-ferâğ eylediğimde ol dahi vech-i muharrer üzre tefevvüz ve kabûl edip bedel-i ferâğ olan mezbûrü’n-na‘t iki bin üç yüz akçeyi tamamen mezbûr Ali yedinden alıp kabz edip sâlifü’z-zikr tarlayı mahallinde ahz ü kabz ve zabt ve tasarrufunu tarafımdan mezbûr Ali’yi taslît eyledim dedikde gıbbe’t-tasdîki’l-mu‘teber mâ cerâ bi’t-taleb ketb [olundu]. Fi’l-yevmi’l-hâmis min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Hüseyin Bey b. Mustafa, Hüseyin b. Mehmed, Ahmed b. Şaban, Ali b. Sefer, Mehmed b. Şaban, Ali b. Mustafa ve gayruhüm mine’l-hâzırîn.