Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 155 Hüküm no: 141 Orijinal metin no: [30b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hazer adlı bir Ermeni neccârın müslüman olan câriyesiyle ilgili Mustafa Beşe’yi vekil tayin etmesi Medîne-i Hazret-i Ebâ Eyyûb-i Ensârî -dâme rıdvânü’l-Bârî-’de Evlice Baba mahallesinde sâkin bâ‘isü’l-kitâb Mustafa Beşe b. Ali nâm neccârdan vech-i âtî üzre da‘vâ ve istişhâd sudûrundan sonra yine mezbûreden el-Hâc Ahmed b. Abdullah ve Kiremitçi Süleyman mahallesinde sâkin diğer Ahmed Çelebi b. Mehmed nâm kimesneler li ecli’ş-şehâde makām-ı kazâya hâzırân olup husûs-ı âti’z-zikre münkir medîne-i mezbûre zâbiti Ali Ağa mahzarında, her biri mahmiye-i İstanbul’da ergenler odalarında mütemekkin Hazer nâm neccâr Ermeni mezbûr Mustafa Beşe indinde vedî‘aten mazbûta iken şeref-i İslâm ile müşerref olan hâzıre bi’l-meclis Belkıs bt. Abdullah câriye-i memlûkesini semen-i misli ile âhara bey‘ ve semenini kabz ve kendisine îsâle ve inde’l-hâce lede’l-hükkâmi’l-kirâm mürâfa‘a ve muhâsamaya mezbûr Mustafa Beşe’yi bizim huzûrumuzda vekîl ve nâib-i menâb nasb ve ta‘yîn etmeğin ol dahi vekâleten mezbûru kabûl ve hıdemât-ı lâzımesin edâya müte‘ahhid olmağın mâ hüve’l-vâki‘ bi’t-taleb ketb olundu. Fî evâhiri Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: muharrir-i hurûf Sâlih Efendi, Hüseyin b. Ali, Dilâver el-Muhzır, Mehmed el-Muhzır ve gayruhüm mine’l-hâzırîn.