Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 156 Hüküm no: 142 Orijinal metin no: [30b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vezir Mustafa Paşa’nın evine getireceği suyun keşfinin yapılması Mustafa Paşalar mahallesi taraflarından Mehmed Ağa vekâleten müvekkilim mezbûrun menzil duvarına cârî olan sudûr. [Derkenar:] Hâlâ zînet-efzâ-yı memleket-i Bağdâd-ı dârü’s-selâm olan vezîr-i dilîr-i mükerrem müşîr-i müşterî-tedbîr-i müfahham zü’l-kadri’r-refî‘ ve’l-câhi’l-menî‘ mecma‘u’l-mekârim ve’l-me‘âlî merci‘ü’l-ekârim ve’l-e‘âlî el-muhtas bi mezîdi inâyeti’l-meliki’s-Samed Mustafa Paşa b. Mehmed -yesserallâhu te‘âlâ fi’d-dâreyn mâ yürîd ve mâ yeşâ’- hazretlerinin her husûsuna vekâlet-i mutlaka ile vekîli olup bimâ hüve nehci’s-sübût şer‘an vekâleti sâbite olan fahrü’l-emâsil ve’l-a‘yân Mehmed Ağa b. Ahmed nâm vekîl meclis-i şer‘de bi’l-vekâle takrîr-i kelâm ve ta‘bîr ani’l-merâm edip mahmiye-i İstanbul’da Sultan Mehmed semtinde İskender Paşa mahallesinde müvekkilim müşârün-ileyh Mustafa Paşa hazretleri kendi sa‘âdet-hâneleri duvarında bundan akdem hasbeten lillâhi te‘âlâ malıyla binâ eylediği çeşme suyuna ilhâk eylemek için Havâss-ı Aliyye kazâsı tevâbi‘inden Terkos nâhiyesinde Uzuncaova başında Derbendyolu demekle ma‘rûf mahalde kendi malıyla âbâr-ı müte‘addide hafr ettirip cem‘ ve tahsîl eylediği miyâhın üzerine varılıp onun erbâbı beyninde mu‘tâd olan tarz-ı ma‘rûf ve semt-i me’lûf üzre mikdârı vezn ve ta‘yîn ve tahrîr olunmak matlûbumdur deyicek savb-ı şerî‘at-ı mutahharadan mevlânâ Sâlih Mehmed Efendi b. Mehmed irsâl olunup ol dahi hâssa suyolu nâzırı olan aynü’l-a‘yân zi’l-ezmân makbûlü’s-sudûr ve’l-erkân Mustafa Ağa b. ( ) ve râh-ı âbîler kethüdâsı olan Üstâd Osman Bey b. Murtaza ve ser-bölüklerinden Veli Bey b. Ramazan ve el-Hâc Abbas b. Mehmed ve hâssa suyolculardan Üstâd Ahmed Çelebi b. Abdülganî ve Abdülmümin b. Yakub ve İsmail Çelebi b. İbrahim nâm kimesneler ve zeyl-i kitâbda muharrerü’l-esâmî olan müslimîn ile paşa-yı müşârün-ileyhin mahall-i mezkûrda malıyla cem‘ ve tahsîl eylediği suyun üzerine varıp keşf ve mu‘âyene ve vezn-i sahîh ile alâ vechi’l-mu‘tâd vezn eylediklerinde kâmil üç masura su cârî olup zikr olunan suyu ol mevzi‘e karîb cennet-mekân firdevs-âşiyân merhûm ve mağfûrun-leh Sultan Süleyman Hân -eskenallâhu fî gurefi’l-cinân- suyu yoluna izn-i mütevellî ile ilhâk ettirilip bir masurası kānûn-ı kadîm üzre hakk-ı mecrâ alıkonuldukdan sonra bâkī iki masura suyu ilhâk eylediği mahalden ifrâz edip bâlâda zikr olunan çeşmesinin suyuna ilhâk olmak üzre bi’l-vekâle ta‘yîn etmeğin vâki‘ü’l-hâli mevlânâ-yı mezbûr tahrîr, ba‘dehû meclis-i şer‘a irsâl olunan Hamza Efendi ile gelip alâ vukū‘ihî inhâ ve takrîr eylediklerinde mâ hüve’l-vâki‘ ve’l-ibtigā sebt olundu. Fi’l-yevmi’s-sâdis min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mustafa b. Hızır, Mahmud b. Mustafa, İvaz b. Abdullah, Ali b. Veli, Şâhin b. Abdullah, Mehmed b. İbrahim, Abdullah b. Cafer, Mahmud b. Süleyman, İbrahim Beşe b. Bayram, Hasan b. Mustafa, Abdi b. Mustafa ve gayruhüm mine’l-hâzırîn.