Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 157 Hüküm no: 143 Orijinal metin no: [31a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vâlide Sultan’ın kethüdâsı Hasan Efendi’nin Müderris köyünden evine getireceği suyun keşfinin yapılması [Derkenar:] Vâlide Sultan su hüccetidir, kethüdâsı Hasan Efendi’nin Sultânü’l-muhadderât bürhânü’l-muvakkarât tâcü’l-afâyif ve’l-mestûrât aliyyetü’z-zât safiyyetü’s-sıfât zübdetü iklîleti’l-muhassanât hazret-i Vâlide Sultan -dâmet ismetühâ ve zâdet iffetühâ ilâ intihâ’i’z-zamân- hazretlerinin hizmet-i kethüdâlıkları ile şeref-yâb olan menba‘ü’l-cûd ve’l-kerem ma‘denü’l-lutf ve’ş-şiyem el-mevsûf bi evsâfi’l-mekârim ve’l-men‘ût bi nu‘ûti’l-mehâmid Hasan Efendi b. ( ) taraf-ı bâhirü’ş-şereflerinden husûs-ı âti’z-zikre vekîl olup vekâleti Şaban Efendi b. Hamza ve Osman Efendi b. Mehmed şehâdetleri ile şer‘an sâbite olan mefharü züvvâri’l-Haremeyni’ş-şerîfeyn es-sâ‘î beyne’s-Safâ ve’l-Merveteyn el-Hâc İsmail Ağa b. Hüseyin nâm vekîl meclis-i şer‘de bi’l-vekâle takrîr-i kelâm ve ta‘bîr ani’l-merâm edip müvekkilim mûmâ-ileyh Hasan Efendi mahmiye-i İstanbul’da merhûm Rüstem Paşa medresesi kurbunda Hâce Kasım Gönanî mahallesinde vâki‘ mülk menziline icrâ olmak için Havâss-ı Aliyye kazâsı iktâ‘ından Müderrisköyü demekle ma‘rûf karye kurbunda Akyar demekle meşhûr mevzi‘de kendi malıyla âbâr-ı müte‘addide hafr ettirip cem‘ ve tahsîl eylediği miyâhın üzerine varılıp onun erbâbı beyninde mu‘tâd olan tarz-ı ma‘rûf ve semt-i me’lûf üzre mikdârı vezn ve mu‘âyene ve keşf olunmak bi’l-vekâle matlûbumdur deyicek cânib-i şerî‘at-ı mutahharadan mevlânâ Sâlih Mehmed Efendi irsâl olunup ol dahi zeyl-i kitâbda muharrerü’l-esâmî olan cemâ‘at-i müslimîn ve hâlâ hâssa suyolu nâzırı olan aynü’l-a‘yân zi’l-akrân makbûlü’s-sudûr ve’l-erkân Mustafa Ağa ve râh-ı âbîler kethüdâsı Üstâd Osman Bey b. Murtaza ve râh-ı âbîler Ser-bölüğü Veli Bey b. Ramazan ve el-Hâc Abbas Bey b. Mehmed ve Ahmed Çelebi b. Abdülganî ve Abdurrahman b. Yakub ve İsmail b. İbrahim nâm râh-ı âbîler ile müvekkil-i mûmâ-ileyh Hasan Efendi’nin mevzi‘-i mezkûrda cem‘ ve tahsîl eylediği suyun üzerine varılıp keşf ve mu‘âyene ve vezn-i sahîh ile alâ vechi’l-mu‘tâd vezn eylediklerinde kâmil üç buçuk masura su cârî olup zikr olunan mütevellî ol mevzi‘e karîb merhûm ve mağfûrun-leh Sultan Bayezid Hân-ı Velî suyu yoluna vezn-i mütevellî ile ilhâk ettirilip kānûn üzre bir masurası hakk-ı mecrâ alıkonuldukdan sonra bâkī iki buçuk masurasını deldiği mahalden ifrâz edip müvekkilim müşârün-ileyh Hasan Efendi hazretlerinin menzil-i mârrü’z-zikrinde cârî olmak üzre vekîl-i mezbûr ta‘yîn eylediğini mevlânâ-yı mezbûr mahallinde tahrîr, ba‘dehû meclis-i şer‘den ma‘an irsâl olunan Hamza Efendi ile gelip alâ vukū‘ihî inhâ ve takrîr etmeğin mâ cerâ bi’t-taleb ketb olundu. Fi’l-yevmi’s-sâdis min şehri Ramazâni’l-mübârek li sene 1072. Şuhûdü’l-hâl: Fahrü’l-emâsil ve’l-a‘yân Mehmed Ağa b. ( ), Fahrü’l-eşbâh Yahya Çelebi b. Halil, Abdi b. Mustafa, Hasan b. Mustafa, İbrahim b. Çelebi, İsmail b. İvaz, Mehmed b. Abdullah, Muharrem b. Osman, Mahmud b. Abdullah, Yusuf b. Abdullah ve gayruhüm mine’l-hâzırîn.