Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 158 Hüküm no: 144 Orijinal metin no: [31a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nureddin Bey b. Mustafa’nın evini Fâtıma Hatun’a satması Medîne-i Hazret-i Ebâ Eyyûb-i Ensârî -radiye anhu’l-Bârî-’de Zeyneb Hâtun mahallesi sâkinlerinden Nureddin Bey b. Mustafa nâm kimesne meclis-i şer‘-i şerîf-i enver ve mahfil-i dîn-i münîf-i münevverde, sâbıkan şehr emîni olup kerîme-i mükerremeleri fahrü’l-muhadderât Fâtıma Hâtun kıbelinden tasdîke vekîl-i şer‘î sâbitü’l-vekâlesi olan fahrü’l-e‘âlî ve’l-e‘âzim mecma‘u’l-me‘âlî ve’l-mekârim Yusuf Efendi mahzarında ikrâr ve takrîr-i kelâm [edip] akd-i âti’z-zikrin sudûruna değin silk-i mülk-i sahîhimde münselik mahalle-i mezbûrede vâki‘ bir tarafdan Ali Beşe ve Cebeci mülkleri ve bir tarafı mekābir-i müslimîn ve bir tarafdan Hamza kızı Fâtıma mülkü ve Emin Efendi bağı ve taraf-ı râbi‘i tarîk-i âm ile mahdûd ve dâhiliyyesi iki bâb fevkānî oda ve tahtında ahır ve matbah ve matbah içinde su kuyusu ve dâhilinde ve hâriciyye etrâfında bağı ve zât-ı eşcâr-ı müsmire ve gayr-ı müsmire bahçeyi ve hâriciyye bir bâb fevkānî oda ve bir sofa ve altında ahır ve kenîfi müştemil mülk-i mevrûsum olan menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık müvekkile-i mûmâ-ileyhâ Fâtıma Hâtun’a kırk bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm eylediğimde ol dahi vech-i muharrer üzre iştirâ ve tesellüm ve kabz ve kabûl edip semeni olan mezbûrü’n-na‘t kırk bin akçeyi tamamen müşteriye-i mûmâ-ileyhâ Fâtıma Hâtun’un mülk-i müşterâsı ve hakk-ı sarîhidir keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ bi’t-taleb kayd şüd. Fi’l-yevmi’t-tâsi‘ min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mevlânâ Veli Efendi el-İmâm, Mustafa Halîfe el-Müezzin, el-Hâc Eyüb b. Süleyman, Mustafa b. Süleyman, Mustafa el-Hallâk, Mehmed el-Hallâk, el-Hâc Ali Efendi el-İmâm, Hasan Bey b. Mustafa el-Bevvâbü’s-sultânî, Şahbaz Bey b. Mustafa el-Bostânî, Mahmud b. Mehmed, Abdülkerim b. Hasan ve gayruhüm mine’l-hâzırîn.