Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 292 Hüküm no: 327 Orijinal metin no: [42b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eski Edirne bostancıbaşısı olup hacca gidecek olan Ali Ağa b. Durak’ın vasiyeti Fazîletlü efendi hazretlerinin imzâsıyladır Husûs-ı âti’l-beyânın mahallinde tahrîri iltimâs olunmağın kıbel-i şer‘-i enverden mevlânâ Mehmed Efendi b. Abdülbâkī irsâl olunup ol dahi hadîka-i hâssada vâki‘ terekecibaşılara mahsûs odaya varıp zeyl-i rakīmde isimleri terkīm olunan müslimîn huzûrunda akd-i meclis-i şer‘-i hatîr eyledikde sâbıkan mahrûse-i Edirne’de bostancıbaşı olup hâlâ ber vech-i tekā‘üd hadîka-i Çatalca ustası olan umdetü’l-emâcid ve’l-a‘yân makbûlü’s-sudûr ve’l-erkân Ali Ağa b. Durak meclis-i ma‘kūd-ı mezbûrda takrîr-i kelâm ve ta‘bîr ani’l-merâm edip vaktâ ki bu dâr-ı dünyâ bî-sebât ve bî-bekā olup sıhhatinin âkıbeti mevt ve devletinin âhiri fevt na‘îmi zıll-ı zâil mukīmi za‘îf-i râhil olduğunu mülâhaza ve küllü nefsin zâ’ikatü’l-mevt mefhûm-ı şerîfi dahi ma‘lûmum olmağın âlem-i fenâ ve şuhûddan menzil-i bekā ve hulûda rıhlet etmezden mukaddem ba‘zı sadakāt-ı mebrûre inşâsına niyet ve müzâfan ilâ mâ ba‘de’l-mevt şöyle vasiyyet ederim ki işbu sene-i mübârekede tavâf-ı Ka‘be-i Mükerreme ve ziyâret-i Ravza-i Hazret-i Resûl-i Ekrem etmek için teveccüh ve azîmet etmeğin bi irâdeti’l-meliki’l-müte‘âl esnâ-i tarîkde bu dâr-ı dünyâdan sarây-ı ukbâya intikāl ve irtihâl edersem sülüs malımdan otuz bin fıddî râyic fi’l-vakt akçe ifrâz ve senede onu on bir buçuk hesâbı üzre istirbâh ve istiğlâl olunup hâsıl olan gallesi ile zikri sebk eden hadîka-i hâssada vâki‘ Pınarodası demekle ma‘rûf odada sâkin olan neferâta beher sene leyâlî-i Ramazân-ı şerîfde ta‘âm tabh oluna deyû husûs-ı mezbûru tenfîze ve cümle akār ve menkūl ism-i mal ıtlâk olunur eşyâmdan alâ mâ farazallâhu te‘âlâ sulbî sagīr oğlum Mehmed ile sulbiye sagīre kızım Fâtıma’ya isâbet eden emvâli hıfz ve mezbûrânın ahvâllerini zabt işbu hâzır bi’l-meclis diğer Ali Ağa b. Ebûbekir’i vasiyy-i muhtâr nasb ve ihtiyâr eyledim dedikde, mezbûr Ali Ağa dahi vesâyet-i mezkûreyi kabûl ve hidemât-ı lâzımesini edâya ta‘ahhüd ettikden sonra mûmâ-ileyh Ali Ağa halası oğlu Muharrem Bey b. Yusuf nâm kimesneyi vasiyy-i mezbûr üzerine nâzır nasb ve ta‘yîn etmeğin vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Yusuf b. Hasan ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: umdetü’l-havâssi’l-mukarrebîn mu‘temedü’l-mülûki’s-selâtîn bostancıbaşı izzetlü Mustafa Ağa, zübdetü’l-emâcid ve’l-ekârim Kethüdâ Ahmed Ağa, zahrü’l-eşbâh Sofa bekçisi Süleyman Ağa, mefharü’l-akrân odabaşı Osman Ağa, fahrü’l-emsâl terekecibaşı Murad Ağa, Ömer Efendi Kâtib-i sebzehâne, Osman Usta Ortaköy ve gayruhüm mine’l-hâzırîn