Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 159 Hüküm no: 145 Orijinal metin no: [31b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Debbağ Hacı Mehmed b. Mehmed ile ortağının Angeli v. Ruso’da olan alacaklarını tahsil etmesi Medîne-i Hazret-i Ebâ Eyyûb-i Ensârî -radiye anhu’l-Bârî-’de kasab tâifesinden Angeli v. Ruso nâm zimmî meclis-i şer‘de debbâğ tâifesinden el-Hâc Mehmed b. Mehmed nâm kimesne mahzarında ikrâr ve takrîr-i kelâm edip bundan akdem benim şerîkim gāib ani’l-meclis el-Hâc İbrahim’in mezbûr el-Hâc Mehmed zimmetinde sekiz bin beş yüz akçe hakkımız olup târih-i kitâbdan dört ay mukaddem meblağ-ı mezbûru merkūm el-Hâc Mehmed’den taleb eylediğimizde edâdan ta‘allül etmekle hâkim-i muvakki‘-i sadr-ı kitâb huzûrunda mürâfa‘a olmuşduk hâkim-i mûmâ-ileyh dahi mûceb-i ikrâra meblağ-ı mezbûrun edâsına hükm ve yedimize hüccet-i şer‘iyye vermişdi el-hâletü hâzihî zikr olunan sekiz bin beş yüz akçeyi tamamen mezbûr el-Hâc Mehmed yedinden alıp kabz edip zimmetinde meblağ-ı mezbûrdan bir akçe ve bir habbe kalmamışdır ve husûs-ı mezbûra müte‘allik âmme-i de‘âvî ve mütâlebâtdan el-Hâc Mehmed’in zimmetini ibrâ eyledim min ba‘d mezbûr ile da‘vâ ve nizâ‘ımız yokdur dedikde gıbbe’t-tasdîki’l-mu‘teber mâ cerâ bi’t-taleb ketb olundu. Fi’l-yevmi’t-tâsi‘ min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mehmed b. Ahmed, el-Hâc Ali b. İbrahim, Ahmed Efendi kassâm kâtibi der Eyüb, Osman b. İbrahim, Hüseyin el-Muhzır ve gayruhüm mine’l-hâzırîn.