Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 159 Hüküm no: 146 Orijinal metin no: [31b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Yorgi’nin vârislerinin mirastan paylarını alması Vilâyet-i Rumeli’nde Mizistre kazâsına tâbi‘ Lonkınık nâm karye zimmîlerinden olup mahmiye-i İstanbul hısnı ebvâbından Cebealikapısı hâricinde bakkal iken hâlik olan Todori v. Yorgo nâm zimmînin verâseti, sadrî kebîr oğulları Yorgaki ve Nikite nâm zimmîler ile zevce-i metrûkesi Zahari bt. Hırsoverki nâm nasrâniye münhasır olduğu şer‘an zâhir ve müte‘ayyin oldukdan sonra mezbûrân Yorgaki ve Nikite ve mersûme Zahari taraflarından metrûkâtı âtî olduğu vâzı‘ü’l-yed olanlardan taleb ve da‘vâ ve ahz ü kabz ve kendilere îsâle ve iktizâ ederse sulh ve ibrâya ve bedel-i sulhü ahz ü kabz ve kendilere îsâle Kostantin v. Harito ve Papado v. Dimitri nâm zimmîler şehâdetleriyle şer‘an vekâleti sâbite olan Hasan Beşe b. Ferhad meclis-i şer‘-i şerîfde yine tâife-i mezbûreden olup hâlik-i mezbûrun metrûkâtına vaz‘-ı yedi ikrâr ile sâbit olan Yani v. Larimat muvâcehesinde bi’l-vekâle ikrâr ve takrîr-i kelâm edip mesfûr Yani müvekkillerim mezbûrûnun mûrisleri hâlik-i mezbûrun metrûkâtına vaz‘-ı yed edip ben dahi bi’l-vekâle taleb eylediğimde on altı bin akçe ve bir sofra sahanı ve bir leğen ve ibrik ve iki kîse münakkaş makrama ahz ü kabz eylemişdir deyû ikrâr ve bana def‘ ve teslîm, ben dahi müvekkillerim için alıp kabz edip dahi ziyâde makbûzâtı ve mektûmâtı olmadığına yemîn teklîf eyledikde ol dahi alâ vefki’l-mes’ûl yemîn billâhi’llezî enzele’l-İncîle alâ İsâ -aleyhi’s-selâm- etmeğin ben dahi ikrârı mertebesi olan meblağ-ı mezbûr ve eşyâ-i merkūmeyi alıp kabz edip da‘vâ-yı mezkûr müte‘allik âmme-i de‘âvî ve mütâlebât ve eymân ve muhâsamâtdan merkūm Yani’nin zimmetini bi’l-vekâle ibrâ ve iskāt eyledim dedikde gıbbe’t-tasdîki’l-mu‘teber mâ cerâ bi’t-taleb ketb olundu. Fi’l-yevmi’t-tâsi‘ min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Receb b. Osman, Ramazan b. Mehmed, Derviş Çelebi b. Ebûbekir, Hüseyin Muhzır ve gayruhüm mine’l-hâzırîn. Papa Yorgi, Payoyoli, Hristodolo v. Yani, Tanaş v. Agani, Duka v. Apostol ve gayruhüm mine’l-hâzırîn.