Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 160 Hüküm no: 147 Orijinal metin no: [31b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aydın v. Yahya’nın bağ ve tarlalarının yarısını yeğenlerine hibe etmesi Vilâyet-i Rumeli’nde Premedi kazâsına tâbi‘ Kamlı nâm karye sâkinlerinden Aydın v. Yahya nâm kimesne meclis-i şer‘de yeğenleri işbu sâhibü’l-vesîka Hasan ve Derviş b. Ali tarafından ikrâr-ı âti’z-zikri tasdîke vekîl olup nehc-i mu‘teber üzre şer‘an vekâleti sâbite olan Kasım Beşe b. Ali muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden karye-i mezbûrede mülk menzilim kurbunda vâki‘ lede’l-ahâlî ve’l-cîrân ma‘lûmetü’l-hudûd iki dönüm bir kıt‘a mülk bağımın nısfı ve kurbunda vâki‘ bir kıt‘a mülk bostanımın nısfını yeğenler merkūmân Hasan ve Derviş’e hibe-i sahîha-i şer‘iyye ile hibe ve temlîk eylediğimde anlar dahi vech-i muharrer üzre ittihâb ve temellük ve kabûl eylediklerinden sonra yine karye sınırı dâhilinde vâki‘ lede’l-ahâlî ve’l-cîrân ma‘lûmetü’l-hudûd ve’l-kıta‘ tarlalarımın dahi nısflarını izn-i sâhib-i arz ile vekîllerim mezbûrâna tefvîz bi’l-ferâğ eyledikde ol dahi vech-i meşrûh üzre tefevvüz ve kabûl eylediler ba‘de’l-yevm mârrü’z-zikr bağ ve bostanın nısfları müvekkillerim mezbûrânın mülk-i mevhûbları ve nısf-ı âharları dahi oğlum Bayram’ın mülkü olup tarlalar dahi kezâlik nısfiyyet üzre dâhil-i taht-ı tasarrufları olup mahallinde her birini [32a] ber minvâl-i muharrer zabt ve tasarrufu tarafımdan mezbûru taslît eyledim dedikde gıbbe’t-tasdîk kayd şüd. Fi’l-yevmi’l-âşir min şehri Ramazâni’l-mübârek li sene ve isneteyn ve seb‘în ve elf. Şuhûdü’l-hâl: Mehmed b. Hüseyin, Hızır Bey b. Sinan, Hüseyin b. Ahmed, Hüseyin b. Hasan ve gayruhüm mine’l-hâzırîn.