Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 161 Hüküm no: 148 Orijinal metin no: [32a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Canfedâ bt. Abdullah’ın bazı eşyası ile mehrini kocası Osman Dede b. Ahmed’e bağışlaması Medîne-i Hazret-i Ebâ Eyyûb-i Ensârî -radiye anhu’l-Bârî-’de vâki‘ Câmi‘-i Kebîr mahallesi sâkinelerinden Canfedâ bt. Abdullah nâm hâtun meclis-i şer‘-i hatîr-i lâzımü’t-tevkīrde zevci işbu râfi‘ü’l-kitâb Osman Dede b. Ahmed nâm kimesne mahzarında ikrâr ve takrîr-i kelâm edip silk-i mülk-i sahîhimde münselik olan emlâk ve eşyâmdan sekiz yemeni yastık ve iki beledî döşek ve iki kilim ve üç beledî minder ve üç yemeni yorgan ve dört sahan ve dört tencere ve iki bakraç ve bir sini ve bir battâl tepsisi ve iki tas ve bir kumaş kaftan ve bir alaca sâde ve bir mor ferâce ve yirmi dört zirâ‘ sekilü? bezi ve bir sepet sandık ve iki ayaklı sandık ve bir sîm ön kuşağı ve zevcim mezbûre zimmetinde mütekarrir olan altı yüz akçe mehr-i müeccelimi dahi mezbûr Osman Dede’ye hibe-i sahîha-i şer‘iyye ile hibe ve temlîk ve teslîm edip ol dahi meclis-i hibede minvâl-i muharrer üzre ittihâb ve temellük ve tesellüm ve kabz ve kabûl eyledi ba‘de’l-yevm eşyâ-i muharrere-i mezbûre ile mehr-i müeccelim olan altı yüz akçede benim vechen mine’l-vücûh alâka ve medhalim yokdur ve zevcim mezbûr Osman Dede’nin emlâk-i mevhûbesi olmuşdur. Keyfe mâ yeşâ’ mutasarrıf olsun dedikde mukırra-i mezbûrenin minvâl-i meşrûh üzre cârî ve sâdır olan ikrârını mezbûr Osman Dede vicâhen tasdîk ve tahkīk edicek mâ hüve’l-vâki‘ kayd şüd. Fi’l-yevmi’s-sâlis aşer min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mustafa Çelebi b. Bayram Efendi, el-Hâc Ali b. Ramazan, Hüseyin Beşe b. Mahmud, Ömer Dede b. Ali, Bayram Dede b. Ahmed ve gayruhüm mine’l-hâzırîn.