Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 161 Hüküm no: 149 Orijinal metin no: [32a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Salamon v. Yahuda’nın Mosi v. Avraham’dan alacağını tahsil etmesi Havâss-ı Aliyye kazâsı tevâbi‘inden kasaba-i Hasköy’de Kiremitçi Ahmed Çelebi mahallesinde sâkin Edirne cemâ‘atinden Salamon v. Yahuda nâm yahudi meclis-i şer‘-i hatîr-i lâzımü’t-tevkīrde işbu râfi‘ü’s-sifri’ş-şer‘î Mosi v. Avraham nâm yahudi muvâcehesinde bi’t-tav‘ ve’r-rızâ ikrâr ve takrîr-i kelâm edip bundan akdem Musa cemâ‘at başım olmak ile beynimizde nice ahz u i‘tâ ve mu‘âmelât-ı şettâ vâki‘ olup hâlâ ba‘de külli hesâb zimmetinde üç yüz sekiz akçe hakkım bâkī kalmışdı el-hâletü hâzihî meblağ-ı mezbûru tamamen merkūm Mosi’den alıp kabz edip zimmetinde bir akçe ve bir habbe hakkım bâkī kalmadı. Min ba‘d mersûm Mosi’nin zimmetini cemî‘ de‘âvî ve mütâlebât ve eymân ve muhâsamâtdan ibrâ ve iskāt eyledim. Mezbûr ile vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîki’l-mu‘teber mâ hüve’l-vâki‘ kayd şüd. Fi’l-yevmi’l-hâdî min şehri Ramazâni’l-mübârek li sene ve isneteyn ve seb‘în ve elf. Şuhûdü’l-hâl: Mehmed Çelebi b. Mustafa Çukadâr, Hüseyin Çelebi b. Ali, Hüseyin b. Hasan, Bayram b. Mehmed, Abdülkādir Çelebi Çukadâr ve gayruhüm mine’l-hâzırîn.