Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 162 Hüküm no: 150 Orijinal metin no: [32a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstiko v. Niko’nun ölen ortağı Yani’de olan alacağı hususunda vârisleriyle sulh olması Çoban tâifesinden İstiko v. Niko nâm zimmî meclis-i şer‘de yine tâife-i mezbûreden Yorgi v. Kiko nâm zimmî muvâcehesinde ikrâr ve takrîr-i kelâm edip bundan akdem mürd olup mesfûr Periso’nun li ebeveyn karındaşı olan Yani nâm zimmî ile ben şerîkler olup târih-i kitâbdan dört sene mukaddem Baklalı nâm karyede koyunlarımızı kışlatmak için ahâlî-i karye-i mezbûreden istîcâr eylediğim kışlak ücretinden hâlik-i mezbûr hissesine iki bin dört yüz otuz akçeden meblağ-ı mezbûru taleb ve da‘vâ eylediğimde ol dahi inkâr ile cevâb vermeğin beynimizde münâza‘ât-ı kesîre cereyân etmişidi el-hâletü hâzihî beynimizde muslihûn tavassut edip da‘vâ-yı mezbûrundan merkūma isâbet edip kable’l-istîfâ hâlik olmağın mecmû‘-ı muhallefâtına vâzı‘ü’l-yed olan merkūm Periso ile an inkâr dört yüz nakd-i râyic fi’l-vakt akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan mezbûrü’n-na‘t dört yüz akçe tamamen merkūm Periso yedinden tamamen alıp kabz edip mâ‘adâ da‘vâsından merkūm Periso zimmetini ibrâ-i âmm-ı kātı‘ü’n-nizâ‘ ile ibrâ eyledim min ba‘d merkūm ile da‘vâ ve nizâ‘ım [yokdur] deyicek mâ hüve’l-vâki‘ kayd şüd. Fi’l-yevmi’r-râbi‘ min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Ali Çavuş zâbit-i Medîne-i Eyüb, Hüseyin Çelebi b. Ali, Mehmed Çelebi b. Ahmed, Mehmed Çelebi Çukadâr ve gayruhüm mine’l-hâzırîn.