Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 165 Hüküm no: 153 Orijinal metin no: [33a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Abdullah’ın öldürülen oğlunun diyeti hususunda Sultanzâde Abdüllatif Bey b. Mehmed Paşa ile sulh olması Mahmiye-i İstanbul’da Müftü Hamamı semtinde Haydar Paşa mahallesinde sâkine Belkıs bt. Abdullah nâm hâtun meclis-i şer‘de sâbıkan Dergâh-ı âlî kapıcı başılarından umdetü’l-emâcid ve’l-e‘âlî Sultanzâde Abdüllatîf Bey ibnü’l-merhûm Mehmed Paşa mahzarında bi tav‘ihâ ikrâr ve takrîr-i kelâm edip bin altmış yedi senesinde müşârün-ileyh Abdüllatîf Bey cezîre-i Mora’da muhassıl-ı emvâl iken sadrî kebîr oğlum Mehmed Çelebi b. ( ) müşârün-ileyh Abdüllatîf Bey’in hizmet-i kitâbetinde iken maktûlen fevt olmağın oğlum katîl-i mezbûr Mehmed Çelebi’nin dem [ve] diyetini bundan esbak müşârün-ileyh Abdüllatîf Bey’den ve hazînedârı gāib ani’l-meclis Osman’dan taleb ve da‘vâ eylediğimde her biri inkârıyla cevâb vermekle ve vesâtat-ı muslihîn ile müşârün-ileyh bey ile hazînedârı mezbûr ile bedel-i ma‘lûm üzerine sulh olup da‘vâ-yı mezkûrdan ibrâ-i zimmet eylemişdim lâkin oğlum katîl-i mezbûr Mehmed Çelebi’nin yanında mevcûd olan nukūd ve menkūlât mecmû‘-ı muhallefâtına müşârün-ileyh Abdüllatîf Bey vaz‘-ı yed edip hâlâ taleb eylediğimde ketm ile cevâb vermeğin beynimizde münâza‘ât-ı kesîre cereyân etmişdi el-hâletü hâzihî beynimizde muslihûn tavassut edip oğlum katîl-i mezbûrun muhallefâtına müte‘allik âmme-i de‘âvîden müşârün-ileyh Abdüllatîf Bey ile beni otuz bin nakd-i râyic fi’l-vakt akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûru yedinden tamamen mezbûr Abdüllatîf Bey’den ahz ü kabz edip oğlum katîl-i mezbûrun ism-i mâl ıtlâk olunur mecmû‘-ı muhallefâtı da‘vâsında mûmâ-ileyhin zimmetini ibrâ ve iskāt eyledim min ba‘d müşârün-ileyh ile husûs-ı mezbûre müte‘allik da‘vâ ve nizâ‘ım yokdur deyicek gıbbe’t-tasdîki’ş-şer‘î [bi’t-taleb ketb olundu]. Fi’l-yevmi’l-âşir min şehri Ramazâni’l-mübârek li sene isneteyn ve seb‘în ve elf. Şuhûdü[’l-hâl]: Es-Sâbikūn.