Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 166 Hüküm no: 154 Orijinal metin no: [33b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fahrî Sultan bt. Sultan Murad Han’ın köle ve câriyelerini âzat etmesi Tahakkuk-ı özr-i şer‘î ile husûs-ı câ’i’z-zikrin mahallinde tahrîri iltimâs olunmağın küttâb-ı mahkeme-i şerîfeden mevlânâ Sâlih Mehmed Efendi b. Mehmed irsâl olunup ol dahi zeyl-i vesîkada muharrerü’l-esâmî olan müslimîn ile medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Debbâğlar Deresi demekle ma‘rûf mahallede sâkine kıdvetü’l-muhadderât zübdetü’l-muvakkarât tâcü’l-mestûrât Fahrî Sultan bt. el-merhûm el-mebrûr ed-darrâc ilâ medârici rahmetü Rabbihi’l-gafûr Sultan Murad Hân hazretlerinin sa‘âdet-hânelerine varıp akd-i meclis-i şer‘-i şerîf eylediğinde sultân-ı müşârün-ileyhâ meclis-i ma‘kūd-ı mezkûrda ikrâr-ı tâmm ve takrîr-i kelâm edip işbu dünyâ-yı denî bî-sebât ve bî-bekā olup sıhhatinin âkıbeti mevt ve hayâtının ahırı fevt ni‘am-ı zıll-ı zâ’il mukīmi za‘îf-i râhil olduğuna âlime ve câzime olduğumdan mâ‘adâ küllü nefsin zâ’ikatü’l-mevt ve küllü hayyin yülâkīhi’l-fevt mefhûmu dahi ma‘lûmum olmağla âlem-i fenâ ve şuhûddan menzil-i bekā ve hulûda rıhlet etmezden mukaddem ba‘zı sadakāt-ı mebrûre inşâsına niyet ve müzâfen ilâ mâ ba‘de’l-mevt şöyle vasiyyet eyledim ki bi irâdeti’llâhi’l-meliki’l-Müte‘âl ben kazâ-i nahb eylediğimde silk-i mülk-i sahîhimde münselik olan mülûk ve memlûke gılmân ve cevârîmin küllîsi malımdan âzâd olup sâir ahrâr-ı asliyyîn ve harâir-i asliyyât gibi hür ve hürre olsunlar ve mâlik olup ism-i mâl ıtlâk olunan kalîl ve kesîr esvâb ve eskālim sultân-ı selâtîn-i zamân hemser-i sâye-i sübhân hülâsatü’l-mâi ve’t-tîn halîfe-i resûli Rabbü’l-âlemîn pâdişâh-ı âlem-penâh -ebbede’llâhu te‘âlâ devletühû ve ibkāhû- hazretlerinin re’y-i şerîf-i âlem-ârâlarıyla cümle-i utekā ve atîkalarım beyninde tevzî‘ olunup kemâl-i keremlerinden vasiyyetimi tecvîz buyurup indillâhi te‘âlâ nâ’il-i ecr-i cezîl olalar ve tenfîz-i vasiyyet için işbu hâmilü’l-kitâb mefharü’l-e‘âlî ve’l-e‘âzim câmi‘ü’l-me‘âlî ve’l-mefâhir Sultanzâde Süleyman Bey el-merhûm Davud Paşa’yı vasiyy-i muhtâr nasb ve ta‘yîn eyledim deyû buyurduklarında anlar dahi vesâyet-i mezbûreyi kabûl ve hıdemât-ı lâzımesini edâya müte‘ahhid olmağın vâki‘ü’l-hâli mevlânâ-yı mezbûr mahallinde ketb ve tahrîr, ba‘dehû meclis-i şer‘a gelip alâ vukū‘ihî inhâ ve takrîr etmeğin mâ cerâ bi’l-ibtigā sebt olundu. Fi’l-yevmi’s-sâmin min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Fahrü’l-emâsil ve’l-akrân Mustafa Ağa b. Ahmed Çorbacı, Türkân Ağa b. Abdullah Re’is Ağa-yı sultân-ı müşârün-ileyhâ, Üveys Bey b. Mehmed Kethüdâ-yı teberdârân, Şaban Bey Ser-bölük-i teberdârân, Hasan Beşe Seroda, İbrahim Bey b. Yakub, Hüseyin Çelebi b. Ali ve gayruhüm mine’l-hâzırîn.