Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 293 Hüküm no: 328 Orijinal metin no: [42b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmügülsüm bt. Vildan Ağa’nın, evini vakıf mütevellisi Hasan Bey b. Abdullah’a bey‘ bi’l-istiğlâl yoluyla sattığı Mahmiye-i İstanbul’da el-Hâc Evliyâ mahallesi sâkinelerinden Ümmügülsüm bt. Vildan Ağa nâm hâtun meclis-i şer‘-i şerîf-i lâzımü’t-teşrîfde mahmiye-i mezbûrede İbrahim Paşa Sarayı demekle ma‘rûf sarayda iç oğlanları tilâvet eyledikleri eczâ-i şerîfe için mevkūfe nukūdun mütevellîsi olan işbu bâ‘isü’l-kitâb Hasan Bey b. Abdullah el-Bevvâbü’s-sultânî mahzarında ikrâr ve i‘tirâf edip mahalle-i mezbûrede vâki‘ bir tarafı Mehmed Ağa b. Mustafa mülküne ve bir tarafı ba‘zen Yusuf ve ba‘zen Mustafa Çelebi mülküne ve iki tarafı tarîk-i âma müntehî fevkānî ve tahtânî odaları ve sofayı ve kileri ve matbah ve selâmlığı ve dört bâb dükkânı müştemil mülk menzilimi bi tarîki’l-istiğlâl mütevellî-i mezbûra altı yüz beş esedî guruşa bey‘ ve teslîm edip ol dahi mâl-ı vakf-ı mezbûr ile iştirâ ve kabûl eyledikden sonra semen-i mezbûr altı yüz beş esedî guruşu mütevellî-i mezbûr yedinden tamâmen ahz u kabz edip menzil-i mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin doksan esedî guruş ve üç rub‘ guruşa mütevellî-i mezbûrdan istîcâr ve kabûl edip ol dahi vech-i muharrer üzre îcâr ve tesellüm eyledi dedikde gıbbe’t-tasdîk mahalle-i mezbûre sükkânından Mustafa b. Abdullah ve Yenikapı hâricinde Merkez Efendi mahallesi sâkinlerinden Mehmed Beşe b. Ramazan nâm kimesneler derk-i menzil-i mezbûra ve ücret-i mezbûr doksan esedî ve üç rub‘ guruşa emr ve kabûlü hâviye kefâlet-i sahîha-i şer‘iyye ile kefîller oldukdan sonra mezbûre Ümmügülsüm Hâtun meclis-i mezbûrda mahalle-i mezbûre İmâmı Abdullah Efendi b. Mahmud mahzarında ikrâr ve i‘tirâf edip eğer müddet-i mezbûre tamâmında asl-ı mâl-ı mezbûr altı yüz beş esedî guruş ile ücret-i mezbûreyi mütevellî-i mezbûra edâ etmezsem menzil-i mahdûd-ı mezbûru semen-i misli ile âhara bey‘ ve semeninden deyn-i mezbûru mütevellî-i mezbûra edâya ve fazlasını bana teslîme mezbûr Abdullah Efendi’yi tarafımdan azl ve in‘izâlden masûne vekâlet-i devriye ile vekîl nasb ve ta‘yîn eyledim dedikde ol dahi vekâlet-i mezbûreyi kabûl ve hizmet-i lâzımesini edâya ta‘ahhüd etmeğin mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Ali Efendi b. Hüseyin el-İmâm, Şaban Ağa b. Süleyman Ser-muhzırân, Hacı Halil b. Hanîfî, Musli Bey b. Veli el-Bevvâbü’s-sultânî, Mehmed Bey b. Ali Ağababası.