Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 294 Hüküm no: 329 Orijinal metin no: [42b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta v. İstati ve Dimo v. Angeli’nin un bahasından Mehmed b. Abdurrahman’dan alacaklarını taksitler halinde tahsil edecekleri Uncu tâifesinden işbu bâ‘iseyi’s-sifr Kosta v. İstati ve Dimo v. Angeli nâm şerîkler meclis-i şer‘-i şerîfde çörekçi tâifesinden Mehmed b. Abdurrahman nâm kimesne mahzarında her biri ikrâr ve takrîr-i kelâm [edip] mezbûr Mehmed zimmetinde yedimizden müşterâ ve makbûl keyli beynimizde ma‘lûm un semeninden ba‘de külli hesâb on iki bin sekiz yüz akçe hakkımız olup bundan akdem meblağ-ı mezbûru merkūm Mehmed’den taleb eylediğimizde ol dahi inkâr etmeğin beynimizde münâza‘ât-ı kesîre vakı‘a olmuşidi el-hâletü hâzihî muslihûn tavassut edip meblağ-ı mezbûr da‘vâsından merkūm Mehmed ile beynimizde sekiz bin akçe üzerine inşâ-i akd-i sulh ettiklerinde biz dahi sulh-i mezbûru kabûl eylediğimizden sonra mezbûr Mehmed’in meblağ-ı mezbûru def‘aten edâya iktidârı olma[ma]ğla meblağ-ı mezbûrun bin akçesini târih-i kitâbdan altı gün tamâmında edâ edecek olup bâkī yedi bin akçeyi her otuz günde ikişer yüz akçe vermek üzre târih-i kitâbdan bin elli gün tamâmına değin taksît eylediğimizde mezbûr Mehmed dahi taksît-i mezbûru kabûl ve meblağ-ı mezkûru vech-i muharrer üzre edâya ta‘ahhüd eyledi dediklerinde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Abdullah Çelebi Kethüdâ, Veli Beşe b. ( ) Çörekçi, Mehmed Bey Yiğitbaşı, Abdi Beşe b. Mehmed, Abdi Çelebi b. Hüseyin, Şükrü Bey b. Mustafa.