Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 174 Hüküm no: 165 Orijinal metin no: [35b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Şeyh Ali’nin vefat eden Ayşe Hatun’da olan alacağını vasîsi Nureddin Çelebi’den alması gerektiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî- de Çavuş Kasım mahallesinde sâkin Mehmed Efendi b. eş-Şeyh Ali meclis-i şer‘de işbu kitâb-ı sıhhat-nisâbın sâhibi Nureddin Çelebi b. Mustafa nâm kimesne mahzarında ikrâr-ı tâmm ve takrîr-i kelâm edip medîne-i mezbûrede Zeyneb Hâtun mahallesinde sâkine iken bundan akdem fevt olan Ayşe Hâtun [bt.] eş-Şeyh Mahmud zimmetinde cihet-i karz-ı şer‘îden kırk bir bin yedi yüz akçe hakkım olup kable’l-edâ fevt olmağla zimmetinde bâkī kalıp lâkin mezbûr Nureddin Çelebi diyâr-ı âharda bulunmağla muhallefât-ı müteveffât-ı mezbûreye medîne-i mezbûre beytülmâli emîni vaz‘-ı yed etmeğin ben dahi emîn-i mezbûr muvâcehesinde meblağ-ı mezbûrun yirmi yedi bin akçesini isbât eyleyip mâ‘adâsı dahi isbât sadedinde iken mezbûr Nureddin Çelebi zuhûr ve isbât-ı verâset etmeğin ben dahi meblağ-ı mezbûru merkūm Nureddin Çelebi’den yedimde olan hüccet-i şer‘iyye mûcebince taleb ve da‘vâ eylediğimde ol dahi bir mikdârını edâdan ta‘allül etmekle beynimizde münâza‘ât-ı kesîre cereyân etmişidi el-hâletü hâzihî beynimizde muslihûn tavassut edip meblağ-ı mezbûr da‘vâsından Nureddin Çelebi ile beni on yedi bin fıddî nakd-i râyic fi’l-vakt akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan mezbûrü’n-na‘t on yedi bin akçeyi tamamen merkūm Nureddin Çelebi yedinden alıp kabz edip müsbet ve gayrı müsbet cem‘an kırk bir bin yedi yüz akçe da‘vâsından mezbûr Nureddin Çelebi’nin zimmetini ibrâ ve iskāt eyledim ba‘de’l-yevm mezkûr Nureddin Çelebi ile vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde mâ hüve’l-vâki‘ kayd şüd. Fi’l-yevmi’s-sâdis aşer min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mustafa Çelebi b. Rıdvan, Mehmed b. Ali, Halil b. Hasan, Ahmed Çelebi b. İslâm, Mehmed Ağa b. Eyüb, Dilâver Muhzır, Üveys? muhzır ve gayruhüm mine’l-hâzırîn.