Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 176 Hüküm no: 167 Orijinal metin no: [36a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mehmed’in Emine bt. Derviş’e kocasına kefil olması sebebiyle borçlu olduğu Mahrûse-i Galata tevâbi‘inden kasaba-i Kasımpaşa’da Tozkoparan mahallesi sâkinelerinden bâ‘isetü’l-kitâb Emine bt. Derviş nâm hâtun meclis-i şer‘-i şerîfede Ayşe bt. Mehmed nâm hâtun mahzarında üzerine da‘vâ ve takrîr-i kelâm edip târih-i kitâbdan üç sene mukaddem mezbûre Ayşe’nin zevci gāib ani’l-meclis Sefer nâm kimesne benden on beş bin fıddî nakd-i râyic fi’l-vakt akçe istikrâz ve kabz edip ben dahi vech-i muharrer üzre ikrâz ve teslîm edip mezbûrdan rehin ve yâhud kefîl taleb eyledikde zevcesi mezbûre Ayşe emr ve kabûlü hâvî kefâlet-i sahîha-i şer‘iyye ile kefîl olmuşidi el-hâletü hâzihî mezbûr Sefer firâr ve gaybet etmekle kefîli olan zevcesi mezbûre Ayşe’den kefâleti hasebiyle taleb eylediğimde edâdan imtinâ‘ eder hâlâ suâl olunup alıverilmek matlûbumdur deyicek gıbbe’s-suâl mezbûre Ayşe cevâbında fi’l-hakīka zevcim mezbûr Sefer müdde‘iye-i mezbûre Emine’den târih-i mezbûr[da] ber minvâl-i muharrer üzre on beş bin akçe istikrâz ve kabz edip ol dahi vech-i mübeyyen üzre ikrâz ve teslîm ve zevcin mezbûrdan rehin ve yâhud kefîl taleb eylediğinde ben dahi emr ve kabûlü hâvî kefâlet-i sahîha-i şer‘iyye ile kefîl bi’l-mâl olmuşidim hâlâ zevcim mezbûr meblağ-ı merkūmu kable’l-edâ firâr ve gaybet etmeğin meblağ-ı mezbûr kefâletime binâen müdde‘iye-i mezbûre Emine’ye zimmetimde lâzımü’l-edâ deynimdir deyû bi tav‘ihâ ikrâr ve i‘tirâf etmeğin ikrâr mûcebince zikr olunan on beş bin akçeyi lede’z-zafer zevci mezbûr Sefer’den eyitmek üzre müdde‘iye-i mezbûre Emine’ye edâ ve teslîm, kefîl olan merkūme Ayşe’ye tenbîh olunup mâ hüve’l-vâki‘ kayd şüd. Fi’l-yevmi’s-sâbi‘ min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Hüseyin Çelebi b. Ali, Diğer Hüseyin b. Hasan, Sâlih Mehmed Efendi b. Mehmed, Ali Beşe er-Râcil, Dilâver muhzır ve gayruhüm mine’l-hâzırîn.