Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 177 Hüküm no: 168 Orijinal metin no: [36a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Ahmed’in arsa ve tarlasını Vasil v. Koyo’ya satması Vilâyet-i Rumeli’nde Piriştine kazâsına tâbi‘ Karahani nâm karye sükkânından Mehmed Beşe b. Ahmed nâm kimesne mahfil-i şer‘de işbu râfi‘ü’s-sifri’ş-şer‘î Vasil v. Koyo nâm zimmî muvâcehesinde bi’t-tav‘ ve’r-rızâ lâ-bi’l-kerh ve’l-cezâ ikrâr ve i‘tirâf edip akd-i câ’i’z-zikrin sudûruna değin zabt ve taht-ı tasarrufumda olan emlâkimden olan karye-i mezbûrede vâki‘ iki tarafdan müşterî-i mezbûr mülkü ve bir tarafdan Piyo nâm zimmî mülkü ve taraf-ı âharı tarîk-i hâs ile mahdûd mülk menzil arsasını cümle tevâbi‘ ve levâhıkı ile yine karye-i mezbûre hudûdu dâhilinde vâki‘ lede’l-ahâlî ve’l-cîrân ma‘lûmü’l-hudûd sekiz çapalık iki kıt‘a mülk bağımı dahi cümle tevâbi‘ ve levâhıkı ile merkūm Vasil’e tarafeynden îcâb ve kabûlü hâvî bey‘-i bâtt-ı kat‘î yedi yüz nakd-i râyic fi’l-vakt akçeye bâtten bey‘ edip ol dahi minvâl-i muharrer üzre iştirâ ve kabûl eyledikden sonra yine karye-i mezbûre sınırı dâhilinde vâki‘ lede’l-ahâliyi’d-diyâr ma‘lûmü’l-kıta‘ ve’l-mikdâr bir kıt‘a çayır ile kırk dönüm tarlalarımın dahi hakk-ı tasarruflarını sâhib-i arz ma‘rifetiyle mezbûr Vasil’e iki bin üç yüz akçe bedel mukābelesinde ferâğ ve tefvîz edip ol dahi vech-i meşrûh [üzre] tefevvüz ve kabûl eyleyip semen-i mezbûr yedi yüz akçe ile bedel-i mersûm ki cem‘an üç bin akçeyi müşterî-i merkūm Vasil yedinden tamamen alıp kabz eylediğimden sonra arsa-i mahdûd-ı mezkûr ile bir kıt‘a bağı ve ol tarlaları mahallinde zabt ve tasarrufa tarafımdan mezbûr Vasil’i taslît eyledim min ba‘d arsa-i mahdûd-ı mezkûr mülk-i müşterâsı ve arâzi-i mersûme dahi dâhil-i hakk-ı tasarrufu olmuşdur, keyfe mâ yeşâ’ mutasarrıf olsun dedikde mâ hüve’l-vâki‘ kayd şüd. Fi’l-yevmi’t-tâsi‘ aşer min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Harunlu? Mehmed Ağa, Mehmed Beşe b. Ali, Murtaza Bey, İbrahim b. Hasan, Ahmedoğlu Hasan ve gayruhüm mine’l-hâzırîn.