Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 177 Hüküm no: 169 Orijinal metin no: [36b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Mehmed’in İbrahim Beşe b. Mehmed’den muhâlaa yoluyla boşanması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Koca Kasım Paşa mahallesi sâkinelerinden Belkıs bt. Mehmed nâm hâtun meclis-i şer‘de zevci işbu bâ‘isü’l-kitâb İbrahim Beşe b. Mehmed nâm kimesne mahzarında ikrâr ve takrîr-i kelâm edip zevcim mezbûr İbrahim Beşe ile hüsn-i zindegânemiz olmamağın beynimizde şikāk vâki‘ olmağla zimmetinde mütekarrir olan iki bin akçe mehr-i müeccelimden ve nafaka-i iddet-i mu‘ayyene ve me’ûnet-i süknâmdan fâriğa olmak üzre zevcim mezbûr İbrahim Beşe ile muhâla‘a eyleyip zevciyyete müte‘allik âmme-i de‘âvî ve mütâlebât ve eymân ve muhâsamâtdan zimmetini ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı rāfi‘u’l-hısâm birle iskāt eyledim dedikde mezbûr İbrahim Beşe meclis-i mezbûrda, zevcem merkūme Belkıs ile vech-i muharrer üzre olan hul‘-ı mezbûru kabûl ve zevciyyete ve sâir husûsa müte‘allik cemî‘ de‘âvî ve mütâlebâtdan ben dahi zimmetini ibrâ ve iskāt eyledim deyicek gıbbe’t-tasdîki’ş-şer‘î mâ hüve’l-vâki. Fi’l-yevmi’s-sâbi‘ aşer min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Hamza Efendi nâib-i recül, Hüseyin b. Ali, Mehmed b. Mahmud, Ali Beşe er-Râcil ve gayruhüm mine’l-hâzırîn.