Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 295 Hüküm no: 330 Orijinal metin no: [43a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. İbrahim’in, İbrahim b. Mustafa’ya sattığı evin bedelinin yarısını tahsil ettiği iddiasıyla açtığı davada haksız olduğu Medîne-i Hazret-i Ebî Eyyûb-i Ensârî -radiye anhü’l-Bârî- mahallâtından Baba Haydar mahallesinde sâkin Ahmed b. İbrahim nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb İbrahim b. Mustafa nâm kimesne mahzarında üzerine da‘vâ ve takrîr-i kelâm edip târih-i kitâbdan sekiz sene mukaddem mahrûse-i Galata’ya tâbi‘ kasaba-i Fındıklı’da İbrahim Efendi mahallesinde vâki‘ bir tarafdan Hasan Yazıcı mülkü ve bir tarafdan Ali Yazıcı mülkü ve bir tarafdan müezzin Mehmed Çelebi mülkü ve bir tarafdan tarîk-i âm ile mahdûd mülk menzilimi mezbûr İbrahim’e tarafeynden îcâb ve kabûlü hâvî bey‘-i bâtt-ı sahîh-i şer‘î ile on bin akçeye bey‘ ve teslîm ol dahi iştirâ ve kabûl ve kabz ve tesellüm ettikden sonra semeni olan meblağ-ı mezbûr on bin akçenin beş bin akçesini mezbûrun yedinden alıp bâkī beş bin akçe mezbûr İbrahim zimmetinde kalmışdır suâl olunup meblağ-ı bâkī beş bin akçenin alıverilmesi matlûbumdur dedikde gıbbe’s-suâl mezbûr İbrahim cevâbında müdde‘î-i mezbûr Ahmed menzil-i mahdûd-ı mezbûru târih-i merkūmda vech-i muharrer üzre semen-i mezbûra bana bey‘ edip semeni olan meblağ-ı mezbûr on bin akçeyi yedimden tamâmen ahz u kabz edip ve hattâ huzûr-ı müslimînde ikrâr dahi etmişidi deyû def‘le mukābele edecek gıbbe’l-istintâk ve’l-inkâr mezbûr İbrahim’den def‘-i mezbûru mübeyyine beyyine taleb olundukda kasaba-i merkūmede İbrahim Efendi mahallesi sükkânından İbrahim Efendi b. Şaban ve Hasan Beşe b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Ahmed bizim huzûrumuzda menzil-i mezbûru merkūm İbrahim’e on bin akçeye bey‘ ve semen-i mezbûr on bin akçeyi merkūm İbrahim yedinden tamâmen ahz u kabz eyledi ve bizi işhâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müdde‘î-i mezbûr Ahmed mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Es-Seyyid Mustafa Çelebi b. es-Seyyid Mehmed, Şükrullah Bey b. Mustafa, Gazanfer Bey b. Tevekkül, Veli b. Mahmud, Resul b. Rıdvan ve gayruhüm.